«Bolashaq» baǵdarlamasynyń 400 túlegi jumyssyz júr
Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Saǵynbek Tursynov osylaı dedi
.Saýal barysynda depýtat, Elbasynyń tikeleı bastamasymen ómirge kelgen «Bolashaq» baǵdarlamasy arqasynda aldyńǵy qatarly bilimdi mamandar daıarlaýdyń tamasha úlgisi qalyptasqanyn aıtyp ótti. Onyń sózine qaraǵanda, baǵdarlama júzege asa bastaǵan ótken 17 jyl ishinde álemniń eń úzdik oqý oryndaryn 3 myńǵa jýyq qazaqstandyq jastar bitirip, maman atansa, áli de oqýyn jalǵastyryp jatqandar sany 4 myńnan asady. «Alaıda sońǵy ýaqytta osy «Bolashaq» baǵdarlamasy arqyly memleket qarjysymen oqyp, elge oralǵan jastardyń jumys tabýy túıindi máselege aınalyp barady. Olarǵa jumysqa turý úshin jumys ótili talap etilmeıdi ári memlekettik organdarǵa birden basqarma bastyǵy qyzmetine taǵaıyndalýyna múmkindik jasalǵan. Alaıda resmı aqparattarǵa qaraǵanda, jumys taba almaı júrgen «bolashaqtyqtardyń» sany 400 den asady. Keıbir aqparattarda 600 adamdy quraıdy dep jazylǵan», - dedi S. Tursynov.
Osy máselelerdi alǵa tartqan depýtat túlekterdiń jumys taba almaýynyń naqty sebebin bilgisi keletinin aıtyp, «eger óz elimizde jumys tabylmaıtyn bolsa memlekettiń qyrýar qarajatyn shyǵyndap, shet elderde oqytýdyń qandaı qajettiligi bar?», degen máseleni kóldeneń tartty. «Osy ýaqytqa deıin bitirgen túlekterdiń 70-80 paıyzy aǵylshyn, orys tilderin bilgenimen memlekettik tildi múlde meńgermegen. Buǵan kim jaýapty? Sondyqtan da, baǵdarlamany odan ári jalǵastyrýdyń qajettiligi bar ma?»,- dedi depýtat.
