«Bolashaq» baǵdarlamasynda qaı mamandyqtarǵa basymdyq beriledi
ASTANA. QazAqparat - Aldaǵy ýaqytta «Bolashaq» baǵdarlamasy boıynsha mamandyqtardyń tizimi qysqartylmaıdy. Degenmen, naqty birneshe baǵytqa basymdyq beriledi, dep xabarlaıdy QazAqparat tilshisi.
«Halyqaralyq baǵdarlamalar ortalyǵy» AQ basshysy Janbolat Meldeshovtyń aıtýynsha, búginde «Bolashaq» baǵdarlamasynda 100-den astam mamandyq bar.
«Alaıda qazirgi zaman talabyna qajetti mamandyq ol IT (aqparattyq texnologııalar) bolyp tabylady. Sosyn kıberqaýipsizdik, neontologııa men arxıtektýra bar. Osyndaı mamandyqtarǵa suranys kóp. Budan bólek, búginde «Astana» halyqaralyq qarjy ortalyǵynyń ashylyp jatqanyn bárimiz jaqsy bilemiz. Sol jerge xalyqaralyq qarjy men qarjy texnologııalary boıynsha mamandar qajet. Sondyqtan osy mamandyqtarǵa basymdyq beriledi», - dedi J.Meldeshov Úkimet úıinde ótken baspasóz máslıxatynda.
Onyń aıtýynsha, búginde «Bolashaq» baǵdarlamasy túlekteriniń 85 protsenti Astana men Almaty qalalarynda jumys isteıdi. Qalǵan 15 protsenti óńirlerde eńbek etip júr.
«Túlekterdi aımaqtarǵa tartý úshin baǵdarlamany óteý mezimin úsh jylǵa qysqartyp otyrmyz. Al bilim salasynda jumys istese, eki jylǵa qysqartylady», - dep atap kórsetti J.Meldeshov.
Aıta keteıik, aldaǵy bes jylda «Bolashaq» baǵdarlamasyna birqatar ózgerister engiziledi. Atap aıtqanda, kvotalyq kategorııalardy alyp tastaý josparlanǵan.
QR Bilim jáne ǵylym vıtse-mınıstri Talǵat Eshenqulovtyń aıtýynsha, basty ózgeristerdiń biri - aǵylshyn tiline qatysty talapty kúsheıtý. Osyǵan baılanysty barlyǵyna birdeı talap qoıylady. «Biz bir jerde tura almaımyz. Sebebi bilimge qatysty talaptar kúsheıip keledi. Sondyqtan aldaǵy bes jylda "Bolashaq" baǵdarlamasyna birqatar mańyzdy ózgerister engiziledi. Negizgi maqsat - baǵdarlamanyń tıimdiligin arttyrý. Birinshiden, aımaqtyq deńgeıde onlaın testileý bolady. Osynyń arqasynda konkýrsqa qatysý kórsetkishi artady degen boljam bar. Ekinshiden, úmitkerlerdi sapaly túrde irikteý maqsatynda aǵylshyn tiline qatysty talaptar kúsheıtiledi. Atap aıtqanda, magıstratýraǵa túsemin deýshiler úshin IELTS-tiń mejesi 6,1-ge deıin kóteriledi. Úshinshiden, aǵylshyn tiline qatysty talaptardyń kúsheıtilýine baılanysty 2025 jyldan bastap barlyq kvotalyq kategorııalardy alyp tastaıtyn bolamyz», - deıdi T.Eshenqulov.
