«Bolashaq» baǵdarlamasyna jyl saıyn stıpendıattar sany tolmaı qalady
ASTANA. QazAqparat - Halyqaralyq baǵdarlamalar ortalyǵy «Bolashaq» baǵdarlamasy boıynsha stıpendıattardyń jyl saıyn tolyq jasaqtalmaıtyndyǵyn málim etti, dep habarlaıdy QazAqparat.
«Bolashaq» baǵdarlamasyna qujat tapsyrýǵa shaqyramyz. Bos oryndar jetkilikti. Ótken jyly 700 stıpendııa bólinip, sonyń biz 544-in ǵana taǵaıyndadyq. Aǵymdaǵy jyly da stıpendıattardyń sany tolmaı qala dep qorqamyz. Sondyqtan barlyq nıet tanytqan adamdardy konkýrsqa qatysýǵa shaqyramyz», - dedi Halyqaralyq baǵdarlamalar ortalyǵynyń prezıdenti Janbolat Meldeshov búgin Úkimet otyrysynan keıin BAQ ókilderine bergen suhbatynda.
Onyń dereginshe aǵymdaǵy jyly 600 stıpendııa bólinip, onyń 251-i berilgen.
«Qujat qabyldaý 15 qyrkúıekke deıin jalǵasady. Stıpendııa taǵaıyndaýdyń áli eki kezeńi bar. Shamamen bes júz stıpendııa beriledi dep úmittenip otyrmyz. Bizde jyl saıyn stıpendıattar sany bolmaı qalady», dedi Meldeshov.
Ortalyq basshysynyń aıtýynsha, búgingi kúni shetelde bilim alǵysy keletin qazaqstandyqtardyń sany arta túsýde. Qazirgi ýaqytta shamamen jetpis myń adam shet memlekette bilim alyp jatyr.
