«Bolashaq» baǵdarlamasyna qujattar Halyqqa qyzmet kórsetý ortalyqtarynda qabyldanatyn bolady
ASTANA. 18 shilde. QazAqparat - «Bolashaq» baǵdarlamasyna qatysý qujattary Halyqqa qyzmet kórsetý ortalyqtarynda jáne e-úkimet portalynda qabyldanatyn bolady, dep habarlady «Halyqaralyq baǵdarlamalar ortalyǵy» AQ-nyń prezıdenti Saıasat Nurbek pm.kz saıtyna bergen suhbatynda.
«Bolashaq» baǵdarlamasy boıynsha qujattar Halyqqa qyzmet kórsetý ortalyqtary arqyly qabyldanatyn bolady, biz ázirlegen memlekettik qyzmet kórsetýdiń sáıkes reglamenti Úkimet qaýlysymen bekitildi jáne Bilim jáne ǵylym mınıstrligi usynatyn memlekettik qyzmetterdiń reestrine kirdi», - dedi S.Nurbek.
Oǵan qosa, qazir elektrondyq úkimet portalymen yqpaldasyp jumys isteıtin «E-Bolashaq» aqparattyq júıesi iske qosylýda. Qazaqstannyń árbir azamaty Internet jelisi bar kez-kelgen jerden baǵdarlamaǵa qatysýǵa óz qujattaryn tapsyrý múmkindigine ıe bolyp otyr.
«Biz munymen shektelmeımiz jáne elektrondyq sandyq qoltańbasy bar kez-kelgen Qazaqstan azamaty e-úkimet portaly arqyly qujattardy tapsyra alatyn bolady», - dep habarlady Halyqaralyq baǵdarlamalar ortalyǵynyń prezıdenti.
Aǵymdaǵy jyly sondaı-aq úmitkerlerdi irikteý rásimi qaıta qaralady. Bıyldan bastap qujattar respýblıka óńirlerinde qabyldanady. Ortalyqtyń qyzmetkerleri 14 oblys ortalyǵynda jáne Almaty qalasynda bolyp qaıtty.
Taǵy bir aıta ketetin másele, baǵdarlamanyń qoljetimdiligin jáne ashyqtyǵyn qamtamasyz etý maqsatynda bıyl elimizde belsendi aqparattyq naýqan júrgizilýde. «Aǵymdaǵy jyly aqparattyq baǵdarlama burynǵydan da ashyq formatta ótti, elektrondyq buqaralyq aqparat quraldaryna úlken basymdyq berildi, tanymal portaldardyń, jańalyqtar portaldary men áleýmettik jelilerdiń qyzmetteri paıdalanyldy, ol jelilerde konsýltatsııalyq jumystar júrgizildi», - dep atap kórsetti Saıasat Nurbek óz sózinde.
Іrikteý protsesiniń ashyqtyǵyn qamtamasyz etý úshin úmitkerlermen bolatyn konkýrstyq áńgimelesýge byltyrdan beri BAQ ókilderi qatysýda. Áńgimelesýde qoıylatyn saýaldar, talapkerler daıyndalý múmkindigine ıe bolýlary úshin, aldymen saıtta jarııalandy. Hattamaǵa qol qoıylǵannan keıin, áńgimelesýdiń nátıjeleri dereý saıt betinde jarııalanady, - dep habarlady Ortalyq prezıdenti.
«Osy sharalardyń arqasynda baǵdarlamanyń ashyqtyǵy men qoljetimdiligi, eń bastysy baǵdarlamaǵa degen halyqtyń senimi artady degen úmittemiz»,- deıdi Saıasat Nurbek.
«Bolashaq» halyqaralyq stıpendııasy 1993 jyly Qazaqstan Respýblıkasynyń Prezıdenti N.Á.Nazarbaevtyń 1993 jylǵy 5 qarashadaǵy № 1394 Jarlyǵymen qurylǵan bolatyn.
