«Bolashaq» baǵdarlamasy túlekteriniń jumysqa ornalasýynda eshqandaı problema joq - B.Jumaǵulov
ANA. 24 aqpan. QazAqparat /Marlan Jıembaı/ - «Bolashaq» baǵdarlamasy túlekteriniń jumysqa ornalasýyna eshqandaı kedergi joq.
Bul týraly búgin BNews.kz portalynda «Elbasy N.Nazarbaevtyń aǵymdaǵy Joldaýynyń negizgi basymdyqtaryn túsindirýge arnalǵan onlaın konferentsııa barysynda QR Bilim jáne ǵylym mınıstri Baqytjan Jumaǵulov málim etti.
Keshe QR Parlamenti Májilisinde «Bolashaq» baǵdarlamasy túlekteriniń jumysqa ornalasýy máselesin sheshýge qatysty saýaldyń týyndaǵanyn atap ótken ol: «Ondaı problema múldem joq. Óıtkeni bul azamattar óte joǵary bilim alǵan, aǵylshyn tilin erkin meńgergen jáne álemdniń úzdik ǵylymı ortalyqtarynda oqyǵan» - dedi.
B.Jumaǵulovtyń atap ótýinshe, olardy jumyssyz qaldy dep aıtý orynsyz. Degenmen 2010-2011 jyldary sheteldiń joǵary oqý oryndaryn támamdaǵan 300-400 stıpendıat áli jumysqa ornalasqan joq. Biraq olar mártebesi joǵary ári tıimdi sharttary bar jumysqa ornalasýǵa nıetti. Sondyqtan «Bolashaq» Prezıdenttik baǵdarlamasy boıynsha bilim alǵan túlektiń jumysqa ornalasýynda qıyndyqtar bar deý qısynsyz.
Sondaı-aq mınıstr tilshiler tarapynan bolashaqtyqtardyń nelikten aýylǵa jumys isteýge barmaıdy degen saýaldyń týyndaıtynyn aıta kele: «Meniń jaýabym: aldymen biz iri kásiporyndarymyzdy qamtamasyz etip alaıyq. Tek ótken jyldyń ózinde ǵana Memleket basshysynyń tapsyrmasymen ındýstrııalyq-ınnovatsııalyq damý baǵdarlamasy boıynsha 800 mlrd. teńgege 152 kásiporyn ashyldy. Al olarda bizdiń bolashaqtyqtar jumys istemegende kim isteıdi?», - dedi.
