«Bolashaq» baǵdarlamasy túlekteriniń eńbekpen óteý merzimi qysqarýy múmkin

ASTANA. QazAqparat – «Bolashaq» baǵdarlamasy boıynsha bilim alǵan túlekterdiń eńbekpen óteý merzimi qaıta qaraldy. Bul týraly Ortalyq kommýnıkatsııalar qyzmetinde ótken brıfıngide «Halyqaralyq baǵdarlamalar ortalyǵy» AQ Basqarma tóraǵasy Ánýar Janǵozın aıtty, dep habarlaıdy QazAqparat tilshisi.

«Ýnıversıtet nemese demeýshiler men jumys berýshiler tarapynan qarjylandyrylyp, qalǵan shyǵyny «Bolashaq» stıpendııasy esebinen jabylatyn túlekterdiń eńbekpen óteý merzimi qysqartylady. Qazir eńbekpen óteý merzimi respýblıkalyq mańyzy bar qalalarda - 5 jyl bolsa, endi ol 4 jylǵa qysqarady. Al basqa óńirlerde bul merzim 3 jyl bolsa, endi 2 jylǵa deıin qysqartylady», - dedi ol.

Sondaı-aq, ol «Bolashaq» baǵdarlamasy aıasynda engiziletin taǵy bir ózgeriske toqtaldy. Onyń aıtýynsha, eger oqý aıaqtalǵannan keıin túlek «Global Fortune 500» tizimindegi jetekshi kompanııalardyń birine jumysqa ornalassa, onda oǵan Qazaqstanǵa oralmaı, bir jyl sol kásiporynda qyzmet etýge múmkindik beriledi.

«Ázirge biz osyndaı jumys úshin 12 aı merzimdi qarastyryp otyrmyz. Degenmen alda bul merzimderdi uzartý múmkindigin oılastyramyz», - dep málim etti Ánýar Janǵozın.