«Bolashaq» baǵdarlamasy: Taǵylymdamadan ótetin BAQ ókilderiniń sheteldegi shyǵyndary óteledi

NUR-SULTAN. QazAqparat – Buqaralyq aqparat quraldary ókilderi «Bolashaq» baǵdarlamasy boıynsha shetelde taǵylymdamadan óte alady. Bul týraly «Halyqaralyq baǵdarlamalar ortalyǵy» AQ Konkýrstyq rásimderdi uıymdastyrý basqarmasynyń bas menedjeri Gúlzat Asanbaeva aıtty, dep habarlaıdy QazAqparat tilshisi.

Osy oraıda ol «Bolashaq» arqyly taǵylymdamadan ótken kezde qandaı shyǵyndar óteletinin aıtty.

«Bizde taǵylymdama baǵdarlamasynan bólek, akademııalyq oqýǵa baratyn úmitkerler de bar, ıaǵnı magıstratýra men doktorantýra qamtylǵan. Osy oraıda taǵylymdama men akademııalyq oqýǵa baratyndardyń oqýy men jol shyǵyny, turǵylyqty jeri men tamaǵy, vızasy, medıtsınalyq saqtandyrýǵa kerek tólemderi óteledi. Talaptarǵa sáıkes konkýrstan ótip, qujattaryn tapsyrsa, atalǵan shyǵyndardyń barlyǵy tólenedi», - dedi G. Asanbaeva.

Budan buryn habarlanǵandaı, «Bolashaq» baǵdarlamasy boıynsha jýrnalıster, rejıserler, operatorlar, grafıster álemniń jetekshi sheteldik uıymdary men JOO-larynda «Operatorlyq óner», «Rejıssýra», «Jýrnalıstıka», «Vızýaldy áserler. 3d anımatsııa» jáne t.b. mamandyqtar boıynsha biliktiligin arttyrýǵa múmkindigi bar.

Taǵylymdamadan ótýge úmitkerlerdiń jalpy jumys ótili úsh jyldan kem emes bolýy tıis, sonyń ishinde sońǵy 12 aıda tańdaǵan mamandyǵy boıynsha jumys isteýi tıis.

Taǵylymdamadan ótýge úmitkerler kepilge múlik usynbaıdy. Mindettemelerdi oryndaý úshin kepildeme bergen eki adamdy usyný ǵana jetkilikti. Garant retinde sońǵy 12 aıda turaqty tabysy bar 50 jasqa deıingi Qazaqstan azamattary bola alady.