«Bolashaq» baǵdarlamasy: Shetelde taǵylymdamadan ótken BAQ ókilderi elimizge oralýy kerek

NUR-SULTAN. QazAqparat – Halyqaralyq baǵdarlamalar ortalyǵy taǵylymdamaǵa jiberiletin adamdardan aǵylshyn tili sertıfıkatyn talap etpeıdi. Bul týraly «Halyqaralyq baǵdarlamalar ortalyǵy» AQ Konkýrstyq rásimderdi uıymdastyrý basqarmasynyń bas menedjeri Gúlzat Asanbaeva aıtty, dep habarlaıdy QazAqparat tilshisi.

«Taǵylymdama baǵdarlamasy boıynsha oqý aıaqtalǵannan keıin, Qazaqstanǵa oralyp, el óńirlerinde úsh jyl qyzmetin atqarady. Atap aıtqanda, bastapqyda qujat tapsyrǵanda úmitker jumys berýshiden ótinim alady. Sheteldegi taǵylymdamadan kelgen soń, jumys ornyńyz saqtalyp turady. Osy oraıda sol jerde úsh jyl qyzmetińizdi atqarýyńyz kerek», - dedi G. Asanbaeva.

Onyń aıtýynsha, taǵylymdamadan ótý úshin halyqaralyq stıpendııany taǵaıyndaýǵa konkýrstyq irikteýge qujattar qabyldaý bıylǵy 5 qyrkúıekte bastalyp, 14 qazanǵa deıin jalǵasady. Ótinimder Egov.kz memlekettik qyzmetter portalynda qabyldanady. Qujatty menedjerler egjeı-tegjeıli qarap shyǵyp, jaýapty eki kúnniń ishinde beredi.

«Taǵylymdamadan ótetin adam kepilge múlik usynbaıdy. Garant retinde sońǵy 12 aıda turaqty tabysy bar 50 jasqa deıingi Qazaqstannyń eki azamaty bola alady», - dedi ortalyq ókili.

Sonymen qatar G. Asanbaeva taǵylymdamaǵa jiberiletin adamdardan aǵylshyn tili sertıfıkatyn Halyqaralyq baǵdarlamalar ortalyǵy talap etpeıtinin aıtty.

«Taǵylymdama boıynsha biz ol sertıfıkatty talap etpeımiz. Sizden aǵylshyn tili deńgeıin dáleldeý úshin shetelden shaqyrtyp otyrǵan joǵary oqý orny talap etpese, biz suramaımyz. Óıtkeni bizge úmitker daıyn shaqyrtý qujatymen kelip, konkýrsqa qatysady. Sondyqtan biz aǵylshyn tili sertıfıkaty boıynsha talap qoımaımyz», - dedi ortalyq ókili.

Shetelde taǵylymdamadan ótýdiń eń uzaq merzimi 12 aı, al qysqa merzimi bir aı bolady.

Budan buryn habarlanǵandaı, «Bolashaq» baǵdarlamasy boıynsha jýrnalıster, rejıserler, operatorlar, grafıster álemniń jetekshi sheteldik uıymdary men JOO-larynda «Operatorlyq óner», «Rejıssýra», «Jýrnalıstıka», «Vızýaldy áserler. 3d anımatsııa» jáne t.b. mamandyqtar boıynsha biliktiligin arttyrýǵa múmkindigi bar.

Taǵylymdamadan ótýge úmitkerlerdiń jalpy jumys ótili úsh jyldan kem emes bolýy tıis, sonyń ishinde sońǵy 12 aıda tańdaǵan mamandyǵy boıynsha jumys isteýi tıis. Sondaı-aq sheteldik uıymnan shaqyrý men nátıjesi V1 deńgeıinen kem emes QAZTEST sertıfıkaty bolý kerek.

Taǵylymdamadan ótetin BAQ ókilderiniń sheteldegi shyǵyndary óteledi.

Foto: old.kzvesti.kz