«Bolashaq» baǵdarlamasy boıynsha memlekettik tildi bilý deńgeıine barynsha mán beriledi - A. Abylaıhan
ASTANA. Maýsymnyń 7-si. QazAqparat /Qanat Mámetqazyuly/ - «Bolashaq» baǵdarlamasy boıynsha úmitkerlerdiń memlekettik tildi meńgerý deńgeıine barynsha mán beriledi. Bul týraly búgin 2010 jylǵy Qazaqstan Prezıdentiniń «Bolashaq» halyqaralyq stıpendııasyn taǵaıyndaý máselesine arnalǵan baspasóz máslıhaty barysynda QR Bilim jáne ǵylym mınıstrligi Strategııa departamenti dırektorynyń orynbasary Aqerke Abylaıhan málim etti,
dep habarlaıdy QazAqparat.
«2008 jyldan beri «Bolashaq» baǵdarlamasy boıynsha konkýrsqa qatysatyndarǵa memlekettik tildi bilý deńgeıi negizgi sharttyń biri bolyp engizildi. Sondyqtan da, sol jyldan bastap elimizdegi Ulttyq testileý ortalyǵynda «Bolashaq» baǵdarlamasynyń úmitkerleri test arqyly memlekettik tilden synaq tapsyrady. Bul rette úmitker 150 suraqtyń 90-na durys jaýap berýi tıis. Buǵan deıin qazaq tilinen synaq tapsyra almaı súringen úmitkerler boldy, biraq bul talap jyl saıyn kúsheıip keledi», dedi A. Abylaıhan.
Bul rette elimizdiń basqa ult ókili bolyp tabylatyn úmitkerlerge de talap birdeı. Sondyqtan, halyqaralyq baǵdarlama boıynsha memlekettik tilden synaq tapsyrý deńgeıi jyl saıyn artyp otyr. «Byltyrǵy jyly úmitker bir orys azamatyna synaq barysynda sheteldegi oqýdy bitirgen soń alǵa qoıatyn josparyn surap, Qazaqstanǵa oralýy týraly bilgimiz kelip edi. Sonda álgi jigit: «It toıǵan jerine, er týǵan jerine» dep qazaqsha maqaldap turyp jaýap berdi. Bul da úmitkerler tarapynan úlken daıyndyqtyń bolǵanyn bildiredi. Sondyqtan da, «Bolashaq» baǵdarlamasy boıynsha memlekettik tildi bilý talaby formaldy túrde qaralatyn shara emes», dedi A. Abylaıhan.
Esterińizge sala keteıik, búgin, maýsymnyń 7-sinen bastap «Bolashaq» halyqaralyq stıpendııasyn taǵaıyndaý úshin qujattardy qabyldaý bastaldy. Qujattardy qabyldaý Astana jáne Almaty qalalarynda júrgiziledi. Іrikteý erejesi, basym mamandyqtar men qajetti qujattar tizbesi, úmitkerlerdiń qosymsha saýalnamalary, sondaı-aq konkýrs boıynsha qosymsha aqparat «Halyqaralyq baǵdarlamalar ortalyǵy» AQ-nyń www. edu-cip.kz resmı saıtynda ornalastyrylǵan.
