«Bolashaq» baǵdarlamasy aıasynda tek 61 adam ǵana doktorantýra deńgeıinde bilim alyp jatyr - QR BǴM vıtse-mınıstri

ASTANA. 22 tamyz. QazAqparat - Doktorantýra ǵylymı áleýeti bar joǵary oqý oryndarynda ornalastyrylady. Bul týraly búgin QR Bilim jáne ǵylym mınıstrliginiń alqa májilisinde bul vedomstvonyń vıtse-mınıstri Murat Orynhanov málim etti.

«Biz doktorantýrany belgili bir ǵylymı áleýeti bar joǵary oqý oryndaryna ornalastyramyz. Eger de bundaı ǵylymı áleýeti jetkiliksiz bolsa, biz «Bolashaq» baǵdarlamasyn paıdalanýdy usynamyz. Degenmen de atalǵan baǵdarlama boıynsha búginde shetelde oqyp júrgen 2 myń 400-iniń ishinen tek 61-i ǵana doktorantýra deńgeıinde bilim alyp jatyr. Al AQSh-ta 7 doktorant qana oqyp júr. Alaıda qazirgi kezde ár JOO men árbir ǵylymı zertteý ınstıtýttary doktoranttar men bilikti kadrlar kerek dep jar salyp júr»,-dedi vıtse-mınıstr.