«Bolashaq» baǵdarlamasyndaǵy til kýrstaryna kim qatysa alady

ASTANA. KAZINFORM — 2022 jyly iske qosylǵan dárigerlerge, ınjenerlerge jáne memlekettik qyzmetshilerge arnalǵan mamandandyrylǵan tildik kýrstar áli de jumys istep tur.

Bul týraly «Halyqaralyq baǵdarlamalar ortalyǵy» AQ basqarma tóraǵasy Ádil Qusmanov Jibek joly telearnasyndaǵy «Ýáde» baǵdarlamasyna bergen eksklıýzıvti suhbatynda aıtyp berdi.

— Tildik kýrstar kvota boıynsha úmitkerlerge, atap aıtqanda dárigerlerge, ınjenerlerge, memlekettik qyzmetshilerge arnalǵan. Bul kýrstar óz betimen sheteldik JOO-ǵa túskenderge arnalmaǵan, — dep túsindirdi Á. Qusmanov.

Onyń aıtýynsha, «Bolashaq» baǵdarlamasy boıynsha baıqaýdan ótken úmitkerler aldymen tildik daıyndyqtan ótip, sodan keıin sheteldik joǵary oqý oryndaryna túse alady.

— Úmitker aldymen «Bolashaq» konkýrsyna qatysyp, sodan keıin ǵana ýnıversıtetke túse alady. Biz oǵan tildik kýrsty aıaqtaǵannan keıin oqý ornyna túsýge ýaqyt beremiz, — dedi basqarma tóraǵasy.

Al sheteldik JOO-ǵa ózdiginen túskender úshin tártip basqasha: olar baıqaýǵa qatysyp, irikteýden ótken jaǵdaıda birden oqýǵa attanady.

— Eger memlekettik qyzmetshi ózdiginen sheteldik oqý ornyna tússe, onda biz oǵan tildik kýrs bermeımiz. Ol tek baıqaýdan ótip, birden oqýǵa attanady, — dep tolyqtyrdy ortalyq basshysy.

Buǵan deıin Ádil Qusmanov «Bolashaq» stıpendııasynyń tıimdiligi zerttelip jatqanyn málimdegen edi.

Á. Qusmanov baıqaýdyń ádil ótpeıtini týraly pikirlerge túsinikteme berdi jáne irikteý protsedýrasy úsh kezeńnen turatynyn jáne árbir kezeńde baqylaý elementteri bar ekenin aıtty. 

Sondaı-aq, Prezıdent synynan keıin «Bolashaq» taǵylymdamasyna jas shekteýleri engizildi.