«Bolashaq» baǵdarlamasyndaǵy ózgerister. Mınıstrlik jańa erejelerdi atady

ASTANA. KAZINFORM — «Bolashaq» halyqaralyq stıpendııasyn taǵaıyndaý úshin úmitkerlerdi irikteý jańa qaǵıdalary bekitildi, dep habarlaıdy Ǵylym jáne joǵary bilim mınıstrligi.

— 2025 jylǵy 17 qańtarda «Bolashaq» halyqaralyq stıpendııasyn taǵaıyndaý úshin úmitkerlerdi irikteý qaǵıdalaryn bekitý jáne «Bolashaq» halyqaralyq stıpendııasyn jumsaý baǵyttaryn aıqyndaý týraly» QR Úkimetiniń 2008 jylǵy 11 maýsymdaǵy № 573 qaýlysyna ózgerister engizý týraly» QR Úkimetiniń Qaýlysy qabyldandy, onda «Bolashaq» halyqaralyq stıpendııasyn taǵaıyndaý úshin úmitkerlerdi irikteý jańa qaǵıdalary bekitildi. Qaýly alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi, — delingen vedomstvo habarlamasynda.

«Bolashaq» halyqaralyq stıpendııasyn taǵaıyndaý úshin úmitkerlerdi irikteýdiń jańa qaǵıdalarynda suryptaý tetikti engizý arqyly konkýrstyq irikteýdi jańartý kózdelgen. Osylaısha, osy jańashyldyqqa sáıkes qajetti ball sanyn jınamaǵan úmitkerler kelesi týrǵa jiberilmeıdi.

Memlekettik qyzmet apparatyn odan ári jaqsartý maqsatynda «memlekettik qyzmetshiler» kategorııasy engizildi. Bul kategorııa boıynsha memlekettik qyzmetkerlerge «magıstratýra» baǵdarlamasyna qatysý úshin til kýrstarynan ótý múmkindigi usynylady.

Sondaı-aq baǵdarlama túlekteri eńbek ótilimin Qazaqstan Respýblıkasy múshe halyqaralyq uıymdarda, mysaly, BUU, ıÝNESKO, ShYU jáne TMU sııaqty uıymdarda óteý múmkindigi qarastyrylǵan.

Konkýrstyq irikteý úshin qajetti qujattar tizbesine ýájdemelik hat engizildi. Budan basqa, konkýrstyq irikteýden óte almaǵan úmitkerlerge sol kúntizbelik jyly konkýrsqa qaıta qatysý quqyǵy beriledi.

Jalpy bul ózgerister «Bolashaq» halyqaralyq stıpendııasyn jetildirip, elimizdiń ártúrli salalarynda bilikti mamandar daıarlaýǵa baǵyttalǵan.

Budan buryn Ǵylym jáne joǵary bilim mınıstri Saıasat Nurbek «Bolashaq» grantyna úmitker bolǵan Jasulan Temirbaev esimdi azamattyń áleýmettik jelidegi málimdemesine pikir bildirdi.