«Bolashaq» baǵdarlamasyna ózgerister engiziledi
ASTANA. KAZINFORM – Qazaqstanda «Bolashaq» halyqaralyq baǵdarlamasyn damytýdyń jańa strategııasy ázirlenip jatyr. Bul týraly Ǵylym jáne joǵary bilim mınıstri Saıasat Nurbek málim etti.
«Qazir aldaǵy úsh jylǵa arnalǵan «Bolashaqtyń» jańa strategııasy ázirlenip jatyr. Bıylǵy naýryz aıynda respýblıkalyq komıssııanyń otyrysyna shyǵaryp, odan keıin tanystyrýdy josparlap otyrmyz», — dedi Saıasat Nurbek Parlament Májilisinde tilshiler suraǵyna jaýap bere otyryp.
Mınıstr jańa strategııada mańyzdy máseleler eskerilgenin aıtty.
«Sonymen qatar irikteý jumystaryn kúsheıtemiz. Máselen, taǵylymdamadan ótý úshin endi ǵylymı maqalaǵa qatysty talaptar qoıylady. Ǵalymdar jumys istep turǵan zerthanalarǵa jiberiledi. Olar jyl saıyn elge oralǵan kezde ǵylymı jobalaryn óndiriske engizý týraly esep berýi tıis», - dedi mınıstr.
