«Bolashaqpen» oqyǵannan keıin Qazaqstanda qyzmet etý mindettemesi zańǵa qaıshy ma
ASTANA. KAZINFORM – QR Konstıtýtsııalyq soty «Bolashaq» baǵdarlamasynyń stıpendıaty túsirgen shaǵymdy qarady. Ol túlekter oqýyn aıaqtaǵannan keıin Qazaqstan aýmaǵynda qyzmetin óteý talaptarymen kelispeıdi.
Azamat Qazaqstan Respýblıkasy Úkimetiniń 2008 jylǵy 11 maýsymdaǵy № 573 qaýlysymen bekitilgen «Bolashaq» halyqaralyq stıpendııasyn taǵaıyndaý úshin úmitkerlerdi irikteý qaǵıdalarynyń 24-tarmaǵynyń 5-tarmaqshasynyń Konstıtýtsııaǵa sáıkestigin tekserý týraly Konstıtýtsııalyq Sotqa júgingen.
Sottyń málimetinshe, ótinish berýshi «Bolashaq» baǵdarlamasynyń túlekteri oqýyn aıaqtaǵannan keıin Qazaqstan aýmaǵynda qyzmetin óteý talaptarymen kelispeıdi. Dálel retinde ótinish berýshi eńbek qyzmetin qashyqtyqtan júzege asyrý formatyn kózdeıtin Eńbek kodeksin kórsetken. Demek, ótinish berýshiniń pikirinshe, qyzmetin óteý maqsatynda Qazaqstan aýmaǵynda naqty bolý talap etilmeıdi.
Alaıda Konstıtýtsııalyq Sot «Bolashaq» baǵdarlamasy boıynsha oqytý taraptardyń ózara kelisimi boıynsha oqý bastalǵanǵa deıin jasalatyn azamattyq shart negizinde júzege asyrylatynyn kórsetti.
— Mundaı kelisim taraptardyń, onyń ishinde oqýdan keıin tikeleı Qazaqstan Respýblıkasynyń aýmaǵynda qyzmetin óteý jónindegi mindettemelerdi aldyn ala erikti túrde qabyldaýyn kózdeıdi. Bul shart Erejelerde ǵana emes, bilim týraly zańnan da týyndaıdy, — dep habarlady Konstıtýtsııalyq sottan.
Osylaısha, Qyzmetin óteý jónindegi erejeler normasynyń Konstıtýtsııaǵa sáıkestigin tekserý úshin negizder joq ekeni aıtylǵan.
Eske sala keteıik, buǵan deıin Astana qalasynyń mamandandyrylǵan aýdanaralyq ákimshilik soty 2017 jyly «Bolashaq» halyqaralyq stıpendııa baǵdarlamasy boıynsha Ulybrıtanııanyń bir ýnıversıtetinde magıstratýra dárejesin alǵan stıpendıattyń ótinishin qaraǵanyn jazǵan edik. 5 jyl ótkennen keıin stıpendıat ýákiletti organdarǵa kepilge salynǵan múlikti aýyrtpalyqtan bosatý týraly ótinishpen júgingen. Alaıda oǵan baǵdarlama erejelerinde kózdelgen mindetti eńbekpen óteýdi oryndamaǵany úshin ótinishi qanaǵattandyrylmaǵan bolatyn.