«Bolashaq» baǵdarlamasy boıynsha kimder bakalavr deńgeıinde oqı alady

ASTANA. KAZINFORM – Májilis zańnamaǵa daryndy balalardy qoldaý saıasatyn jetildirip, memlekettik tildiń qoldanysyn birizdendirýdi kózdeıtin zań jobasyn qabyldady.

Zań jobasyn ázirlegen jumys tobynyń jetekshisi, Májilistegi Áleýmettik-mádenı damý komıtetiniń tóraǵasy Ashat Aımaǵambetov atalǵan zańda memlekettik tildiń tsıfrlyq ulttyq sózdik qoryn jasaý týraly arnaıy norma bolatynyn aıtty. Bul norma memlekettik tildi jasandy ıntellekttiń kúshimen damytýdy kózdeıdi.

Sondaı-aq, qujatta bedeldi halyqaralyq pán olımpıadalary men ǵylymı saıystarda jeńimpaz atanǵan jastardy «Bolashaq» baǵdarlamasynyń aıasyn keńeıtý arqyly qoldaıtyn norma bar. 

- Biz «Bolashaq» baǵdarlamasynyń aıasyn keńeıtýdi usynyp jatyrmyz. Qazir «Bolashaq» baǵdarlamasy boıynsha tek magıstratýra jáne doktorantýra deńgeıinde ǵana bilim alýǵa bolady. Biz soǵan bakalavrıatty da qosyp otyrmyz. Biraq ol bárine emes, tek daryndy, ıaǵnı arnaıy tizimge kirgen, tańylǵan, bedeldi degen halyqaralyq olımpıadada nemese ǵylymı saıysta jeńimpaz atanǵan talapker, óz baǵyty boıynsha ári qaraı bilim alamyn dese, oǵan «Bolashaq» baǵdarlamasy» aıasynda shetelde memleket esebinen joǵary bilim alýǵa múmkindik beriledi. Ol balalar «Bolashaq» arqyly bakalavr dárejesinde bilim alǵannan keıin keminde 3 jyl boıy Qazaqstanda jumys isteýge mindetteledi, - deıdi Ashat Aımaǵambetov.