«Bolashaq» baǵdarlamasy aıasynda atom energetıkasy mamandary bilim alady
ASTANA. KAZINFORM — Memlekettik keńesshi Erlan Qarınniń tóraǵalyǵymen Shetelde kadrlar daıarlaý jónindegi respýblıkalyq komıssııanyń kezekti otyrysy ótti. Bul týraly Aqordanyń baspasóz qyzmeti habarlady.
— Basqosý barysynda halyqaralyq pán olımpıadalary men ǵylymı jobalar konkýrstarynyń tizbesi qaraldy. Endi atalǵan zııatkerlik dodalardyń jeńimpazdary «bakalavrıat» baǵyty boıynsha «Bolashaq» stıpendııasyna úmitker bola alady. Talqylaý qorytyndysynda tizbege matematıka, fızıka, hımııa, bıologııa jáne basqa da jalpy bilim beretin pánderden ótetin beldi halyqaralyq olımpıadalardy qosý usynyldy, — delingen habarlamada.
Keıingi 3 jylda 76 qazaqstandyq oqýshy jalpy bilim beretin pánderge arnalǵan halyqaralyq olımpıadalardyń júldegeri atanǵan.
Sondaı-aq otyrys barysynda baǵdarlamaǵa jańadan qosylǵan «atom salasy qyzmetkerleri» sanaty boıynsha konkýrstyq irikteýge qatysýshylarǵa qoıylatyn talaptar men ólshemsharttar talqylandy. Biliktiligi joǵary kadrlardy daıarlaý otandyq atom ónerkásibin sapaly damytýdaǵy mańyzdy qadamnyń biri bolady.
Jıyn sońynda Ǵylym jáne joǵary bilim mınıstrligine jáne Halyqaralyq baǵdarlamalar ortalyǵyna «Bolashaq» baǵdarlamasy aıasyndaǵy konkýrstyq irikteýdiń tetikterin odan ári jetildirý jóninde naqty hattamalyq tapsyrmalar berildi.
Osydan buryn «Bolashaq» baǵdarlamasynyń shákirtaqysy men tólemderiniń mólsheri qaıta qaralýy múmkin ekeni aıtyldy.