«Bolashaq» baǵdarlamasy aıasynda 500-den astam ǵylymı qyzmetker bilim aldy

ASTANA. KAZINFORM — «Halyqaralyq baǵdarlamalar ortalyǵy» AQ ǵylym qyzmetkerlerin 12 sáýir — Ǵylym qyzmetkerleri kúnimen quttyqtady. 

— Búgingi tańda ǵylymı kadrlardy qoldaý, halyqaralyq yntymaqtastyqty keńeıtý jáne bilim men tehnologııa transferin damytý — strategııalyq mańyzǵa ıe baǵyttar. Bul rette «Bolashaq» jáne «Ǵylymı taǵylymdamalar» baǵdarlamalary ulttyq ǵylymı áleýetti kúsheıtip, zııatkerlik kapıtaldy arttyrýǵa qyzmet etip otyr, — delingen habarlamada. 

Ortalyqtyń dereginshe, «Bolashaq» baǵdarlamasy aıasynda álemniń jetekshi joǵary oqý oryndarynda 13 myńnan astam maman daıarlanyp, onyń ishinde 500-den astamy «ǵylymı qyzmetker» sanaty boıynsha bilimin aıaqtaǵan.

— Túlekterdiń 61,5%-y gýmanıtarlyq, 31,7%-y tehnıkalyq, 6,4%-y medıtsınalyq jáne 0,4%-y shyǵarmashylyq baǵyttar boıynsha bilim alǵan. Sonymen qatar, «Ǵylymı taǵylymdamalar» baǵdarlamasy aıasynda 1300-ge jýyq maman daıarlanyp, olardyń 55%-y gýmanıtarlyq, 39%-y tehnıkalyq, 5%-y medıtsınalyq jáne 1%-y shyǵarmashylyq baǵyttarǵa tıesili, — dep habarlady ortalyqtan.

Atalǵan kórsetkishter elimizde ǵylym salasynyń júıeli túrde damyp kele jatqanyn aıqyn kórsetedi. Bul jetistikter, eń aldymen, ǵylymı qyzmetkerlerdiń tabandy eńbegi men úzdiksiz izdenisteriniń nátıjesi. Olardyń ǵylymı jańalyqtary men jetistikteri eldiń bolashaǵyn aıqyndap, onyń turaqty damýyna mańyzdy úles qosady.

Aıta keteıik, Memleket basshysy Qasym-Jomart Toqaev ǵalymdardy marapattaý rásiminde «Ozyq memlekettiń qazyǵy — ǵylym, al qazynasy — ǵalym» degen edi.