«Bolashaq» arqyly daryndy oqýshylardy bakalavrıatqa qalaı túsirýge bolady

ASTANA. KAZINFORM — QR Ǵylym jáne joǵary bilim vıtse-mınıstri Darhan Ahmed-Zakı qandaı ǵylymı olımpıadalardyń jeńimpazdary «Bolashaq» baǵdarlamasynyń bakalavrıatyna túse alatynyn túsindirdi.

Atap aıtqanda, mundaı shara daryndy jastardy qoldaýǵa jáne eldiń adamı kapıtalyn damytýǵa baǵyttalǵan.

- Baǵdarlama aıasynda granttardy berýdi respýblıkalyq komıssııa júzege asyryp keledi. Osy mehanızm bilim olımpıadasynyń jeńimpazdaryna da saqtalady. Talapkerler jeńimpaz atanǵanyn rastaıtyn dıplomdy qosa tapsyrady. Odan keıin olardyń ótinishterin ulttyq táýelsiz komıssııa qarap, barlyq sheshimder respýblıkalyq komıssııanyń qaraýyna jiberiledi. Osy oraıda «Bolashaq» arqyly oqýǵa jiberýge sheshim qabyldanady, - dedi D. Ahmed-Zakı Senatta tilshiler suraǵyna jaýap bere otyryp.

Onyń aıtýynsha, talapkerler úshin joǵary oqý oryndarynyń tizimi «Bolashaq» baǵdarlamasynyń basqa da úmitkerlerimen birdeı bolady.

- Eń bastysy, osy jerde olımpıadalardyń qosymsha tizimi anyqtalady. Bul turǵyda mańyzdy olımpıadalar qamtylady, ıaǵnı fızıka, matematıka, ınformatıka jáne ınjenerııa boıynsha halyqaralyq olımpıadalar, - dedi vıtse-mınıstr. 

Budan buryn habarlanǵandaı, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine mádenıet, bilim berý jáne tálimgerlik máseleleri boıynsha ózgerister men tolyqtyrýlar engizý týraly» Zańy maquldandy.

Zań aıasynda halyqaralyq olımpıadalar men konkýrstarda jeńiske jetken daryndy oqýshylarǵa «Bolashaq» baǵdarlamasy arqyly úzdik sheteldik joǵary oqý oryndaryna bakalavrıatqa túsý múmkindigi engizildi.