Bolashaǵymyz Joldaýda kóterilgen máseleniń sheshimine de baılanysty – Jarasbaı Súleımenov
Jarasbaı Súleımenovtiń aıtýynsha, elimiz Táýelsizdik alǵannan beri Memleket basshysynyń jyl saıyn halyqqa Joldaý arnaýy dástúrimizge berik engen. Ótetin aıy, ýaqyty, saǵatyna deıin aldyn ala habarlanǵandyqtan, kópshilik Joldaýdy asyǵa kútedi. Bul joly qandaı máseleler kóteriledi. Prezıdent halyqqa qandaı jaqsylyqtar usynady eken dep eleńdeıdi. Shamamen 1,5 saǵatqa sozylǵan Prezıdenttiń sózin tyńdaǵan belgili jýrnalıst úmitiniń aqtalǵanyn aıtady.
«Bıylǵy Joldaýdyń júgi tym salmaqty. Kóterilgen máseleler óte ózekti, qazirgi qalyptasyp otyrǵan kúrdeli jaǵdaıǵa baılanysty kezegin kútip turǵan mindetter jan-jaqty qamtylǵan. Meni erekshe qýanyshqa bólegen bir jaı – Joldaýdyń júrekten shyqqany. «Men azamattarymyzdyń erteń emes, búgin baqytty ómir súrgenin qalaımyn. Osy turaqsyz qubylmaly álemde Qazaqstanymyz bizden basqa eshkimge kerek emes. Sondyqtan maǵan elimniń amandyǵy men jerimniń tutastyǵynan asqan eshbir qundylyq joq. Qyzmetime túrli adamdardyń beretin baǵasynan góri, memleketimizdi qorǵap qalý men úshin asa mańyzdy mindet. Osy jolda jaýapkershiliktiń barlyǵyn moınyma alýǵa daıynmyn» dedi Prezıdent aǵynan jarylyp. Júrekten shyqqan sóz júrekke jetse eken dep tileımin», - deıdi Jarasbaı Súleımenov.
Joldaý barysynda Qasym-Jomart Toqaev buqaralyq aqparat quraldarynyń róline de toqtaldy. Jarasbaı Qabdollaulynyń aıtýynsha, dál qazirgi ýaqytta BAQ-qa úlken jaýapkershilik artylǵan.
«Memleket basshysynyń «buqaralyq aqparat quraldary básekege qabiletti jáne erkin bolý kerek. Bul qaǵıdat qazir kez-kelgen órkenıetti el úshin asa mańyzdy. Otandyq aqparat quraldarynyń óńirde, Qazaqstanda jáne álemde bolyp jatqan úderister týraly óz kózqarasy bolýǵa tıis. Elimizdiń aqparattyq qaýipsizdigi, tipti, ıdeologııalyq derbestigi osyǵan tikeleı baılanysty» degen sózderi de maǵan erekshe unady. Qasym-Jomart Kemelulynyń jýrnalıster ózderine jáne azamattarǵa shynaıy janashyr bolýǵa tıis, BAQ bekerden-beker tórtinshi bılik atanbasa kerek, sol sebepti sizder jurttyń sanasy men sezimine yqpal etý máselesine muqııat qaraǵandaryńyz jón degen sózderi de erekshe áser etti. Osyǵan oraı myna máselege nazar aýdarǵym keledi:
Prezıdent almaǵaıyp zamanda aldymyzda turǵan mindetterdi aıqyndap berdi. Sóz joq, elimizdiń bolashaǵy, halqymyzdyń taǵdyry osy máselelerdiń qalaı sheshiletinine tikeleı baılanysty. Demek, alda turǵan mindetterdi júzege asyrýǵa halyq bolyp jumylýymyz kerek. Ol úshin Joldaýdy nasıhattaýǵa jańa kózqaras qajet. Aıtylǵan sóz jerde qalmaı, qoǵamnyń ár múshesiniń sanasyna tereń sińirilse ǵana biz óz maqsatymyzǵa jetemiz. «Jańa Qazaqstandy» tezirek qurý úshin bizge sóz emes, naqty is kerek. Olaı bolsa, aǵaıyn, búgingideı kúrdeli kezeńde berekesiz isterden bas tartyp, memleket basshysynyń tóńiregine toptasaıyq, ortaq mindetterdi sheshýge el bolyp jumylaıyq», - deıdi Jarasbaı Súleımenov.
