Bokstyń Olımpıadadan shettetilý yqtımaldyǵyna qatysty QBF ustanymy qandaı
ASTANA. QazAqparat - Qazaqstan boks federatsııasynyń vıtse-prezıdenti Danııar Ábilǵazın bokstyń Olımpıada oıyndarynan shettetilý yqtımaldylyǵyna qatysty pikir bildirdi, dep habarlaıdy QazAqparat tilshisi.
«Tımýr Asqaruly Qulybaev Tokıoda Ulttyq Olımpıada komıtetteri qaýymdastyǵynyń Bas assambleıasynda bolyp qaıtty. Ol Tomas Bah (Halyqaralyq Olımpıada komıtetiniń prezıdenti) jáne Halyqaralyq Olımpıada komıtetiniń atqarýshy komıtetiniń múshelerimen kezdesý ótkizdi. Olardyń bári de áýesqoı bokstyń aınalasynda bolyp jatqan jaǵdaılarǵa alańdaýly. HOK-tyń rezolıýtsııasynan, AIBA-men barlyq baılanysty toqtatqanynan bálkim qazir bárińiz de habardar shyǵarsyzdar. Olar da qazir áýesqoı boks ary qaraı qalaı damıtynyna qatysty oılaný ústinde», - deıdi Danııar Ábilǵazın búgin Astanada ótken QBF-nyń otyrysynda.
Onyń aıtýyna qaraǵanda, Qazaqstan boks federatsııasy men onyń prezıdenti Tımýr Kýlıbaev dál osy máseleniń retke keltirilýine atsalysýda.
«Birqatar keńes jumystarynan keıin biz bul máselege qatysty naqty ustanymymyzdy bildiremiz. Máseleniń tezirek retteleýin tilep otyrmyz. 2020 jylǵy Olımpıada oıyndaryna bokstyń enýine Qazaqstan da múddeli. Tımýr Asqaruly osy jumys úshin bar kúshin salady. Halyqaralyq jaǵdaı áli de kúrdeli. Erler jáne áıelder komandasynyń sátsizdikteri kózge kórinip tur», - deıdi ol.
Aıta keterligi, budan buryn Halyqaralyq Olımpıada komıteti 2020 jylǵy Tokıo Olımpıadasynda bokstan týrnır ótkizý boıynsha josparlardyń bárin toqtatqan bolatyn. HOK-tyń resmı habarlamasyna sáıkes, mundaı sheshim Halyqaralyq áýesqoı boks qaýymdastyǵyna (AIBA) qatysty júrgizilip jatqan tergeýge baılanysty HOK atqarýshy komıteti shyǵarǵan.
Eske sala ketsek, búgingi jıynda belgili bıznesmen Keńes Raqyshev Qazaqstan boks federatsııasynyń halyqaralyq baılanystar boıynsha vıtse-prezıdenti bolyp saılanǵan bolatyn. Boks federatsııasynyń jańa vıtse-prezıdenti búgin federatsııa jumysynyń jyldyq qorytyndysyna baılanysty Astanada ótken jıynda tanystyryldy. Al oǵan deıin atalmysh qyzmetti Almasadam Satqalıev atqarǵan edi.
