Bokstyń Olımpıada oıyndarynan shyǵarylýy múmkin emes - AIBA
ASTANA. QazAqparat - Halyqaralyq boks qaýymdastyǵy (AIBA) ókilderi bokstyń olımpıadalyq sport túri mártebesinen aıyrylýy múmkindigine qatysty pikir bildirdi, dep habarlaıdy «QazAqparat» HAA tilshisi.
«Ondaı jaǵdaı bolmaıdy dep úmittenemiz. Ony kóz aldymyzǵa da elestete almaımyz, sebebi, biz boksty jaqsy kóremiz jáne bul sport bizdiń ómirimizdiń ajyramas bóligi. Boksty osy mártebesinen aıyrýǵa qansha adamnyń quzyreti jetetindigine qatysty eshqandaı aqparatymyz joq», - dedi AIBA-nyń jańa atqarýshy dırektory Tom Vırdjets uıymnyń saıtynda jarııalanǵan suhbatta.
Sondaı-aq, ol uıymnyń Halyqaralyq olımpıada komıteti qoıǵan talaptardyń barlyǵyn oryndaıtynyn aıtty.
«Bul jaǵdaıǵa baıyppen qaraımyz. HOK tarapynan qoıylǵan talaptardyń bárin oryndaýǵa barlyq kúsh-jigerimizdi salamyz. Komıtettegiler bizdiń ózgerýge jáne úlgili olımpıadalyq federatsııa bolýǵa degen talpynysymyzdy kóredi dep senemiz», - dedi ol.
T. Vırdjetsti AIBA-nyń ýaqytsha prezıdenti Gafýr Rahımov qoldady.
«Men AIBA-nyń jańa atqarýshy dırektory Tom Vırdjetspen birge AIBA-da jasalǵan jáne qazirgi ýaqytta júzege asyrylyp jatqan basqarý men jetekshilik salalaryndaǵy reformalarǵa tolyqtaı qosylamyn», - dedi ol.
Sondaı-aq, ol AIBA-da uıym qyzmetiniń ashyqtyǵyn arttyrý úshin barynsha kúsh salynyp jatqandyǵyn jetkizdi.
«Uıym Olımpıada otbasynyń laıyqty múshesi bolyp qala berýi úshin biz onyń ashyqtyǵyn arttyrý turǵysynda ilgeri jyljyp kelemiz, AIBA-ny basqarý, qarjy salalarynda jáne de bokstaǵy ártúrlilik, tórelik etý sekildi máselelerdiń bári meniń AIBA-nyń Atqarýshy komıteti, HOK jáne AIBA-ny jańartý boıynsha ulttyq federatsııalarǵa bergen ýádeme saı iske asyrylyp jatyr», - dedi Rahımov.
Esterińizge sala keteıik, Halyqaralyq olımpıada komıtetiniń basshysy Tomas Bah aǵymdaǵy jyldyń aqpan aıynda AIBA-ǵa qatysty tergeý jumystarynyń bastalǵanyn málimdegen edi.
HOK-te Olımpıada oıyndaryndaǵy tórelik etýge qatysty alańdaýshylyq bildirgen bolatyn. HOK-ke nátıjesi kúdik keltirgen jekpe-jekterdiń biri Rıo Olımpıadasynyń fınalynda qazaqstandyq Vasılıı Levıt pen reseılik Evgenıı Tışenko arasynda ótken kezdesý boldy. Sol kezde kórermenderdiń jappaı narazylyǵyna qaramastan, tóreshiler jeńisti RF ókiline bergen edi.
