Bokstan jasóspirimder arasyndaǵy Álem chempıonatynda qazaqstandyqtar 5 kúmis, 6 qola medal ıelendi
ALMATY. 29 qyrkúıek. QazAqparat - Keshe bokstan Bolgarııanyń Albena qalasynda ótip jatqan jasóspirimder men jastar arasyndaǵy Álem chempıonaty aıaqtaldy.
Oǵan 29 elden jáne Halyqaralyq áýesqoı boks qaýymdastyǵynan 150 sportshy qatysty. On úsh salmaq dárejesi boıynsha ótken bul dodaǵa Reseı, Túrkııa, Ýkraına elderi tolyq qurammen, al Qazaqstan on eki boksshymen qatysqan bolatyn.
Asa tartysty ótken saıysta qazaqstandyqtar 5 kúmis, 6 qola medal oljalady. Atap aıtqanda tek aqtyq synda Nazerke Jurǵaraeva (46 kg) amerıkandyq Kaltın Oroskoǵa, Asyl Asqarova (48 kg) reseılik Ekaterına Paltsevaǵa, Balaýsa Muzdyman (54 kg) ýkraınalyq Angelına Bondarenkoǵa, Lıýbov Hasıeva (66 kg) reseılik Svetlana Hodarevskaıa,ǵa Aqmaral Shamshıdenova (80 kg) reseılik Vlada Kalashevaǵa ese jiberip, kúmis júldeger atandy. Al jartylaı synǵa deıin súrinbeı jetken Áıgerim Oshaqbaı (52 kg), Nazym Işanova (57 kg), Ekaterına Anısımova (60 kg), Aıda Ábikeeva (63 kg), Baıan Aqbaeva (70 kg) men Altyn Muqyshbekova (75 kg) qola júldeger atandy. Jalpy komandalyq esepte Reseı birinshi, AQSh ekinshi, Túrkııa úshinshi oryn aldy.
