Bokstan Ulttyq qurama kapıtany aýyl jastaryna sheberlik sabaq ótkizdi
JALAǴASh. QazAqparat - Bokstan Qazaqstan quramasynyń kapıtany Qamshybek Qońqabaev aýyldaǵy jas sportshylarǵa sheberlik dárisin ótkizdi, dep habarlaıdy QazAqparat tilshisi.
Belgili boksshy Qyzylorda oblysy Jalaǵash aýdanyna qarasty Mádenıet aýylyndaǵy sport mektebi shákirtterimen júzdesti. Atalmysh mektep 2009 jyly ashylǵan. Búginde aýyl balalary onda boks, dzıýdo, taekvondo, qazaq kúresi, erkin kúres, voleıbol, gandbol sekildi sporttyń 7 túrinen tálim alady.
Sheberlik dárisin ótkizý sharasyna balalarmen birge jergilikti turǵyndar da kóptep jınaldy. Barlyǵy sharshy alań tórinde shapshań qımylymen kózge túsip, talaı márte jeńimpaz atanǵan jampozben júzdesýge nıet tanytty.
Qamshybek Qońqabaev 1991 jyly 18 qarashada Qyzylorda qalasynda dúnıege kelgen. Kóptegen jarystarda top jarǵan. Ázirge eń joǵary jetistigi - 2017 jyly Germanııada ótken álem chempıonatyndaǵy (91 keli salmaqta) kúmis júlde. Sondaı-aq, sol jyly Ózbekstanda bolǵan Azııa chempıonatynda kúmis medal ıelendi.
«Men balalardyń yntasyna rıza boldym. Olardyń arasynan erteń elimizdiń bedelin asqaqtatatyn myqtylar shyǵatynyna senimdimin», - dedi Qamshybek Qońqabaev.
Sheberlik dárisinde bylǵary qolǵap sheberi jas órenderge bokstyń kóptegen ádis-tásilderin úıretti. Olardyń tarapynan qoıylǵan saýaldarǵa jaýap qaıyrdy.
Aýyl aqsaqaldary oblys ortalyǵynan kelgen boksshyǵa syı-sııapat jasady. Qazaqy dástúrmen shapan japty.
