Bokstan U22 Azııa chempıonaty: Qazaqstan quramasynan úsh qyz altyn medal jeńip aldy
ASTANA. KAZINFORM – Bokstan Shrı-Lankada jalǵasyp jatqan U22 Azııa chempıonatynyń fınalynda besinshi sportshymyz shyqty.
Sportty damytý dırektsııasy málimetinshe, 54 kelide Elına Bazarova sheshýshi synda vetnamdyq Thı Maı Chýkpen kezdesip, alǵashqy raýndtan-aq jeńiske degen jigerin kórsetti. Nátıjesinde tóreshiler biraýyzdan jeńisti otandasymyzǵa berdi
Aıta keteıik, Elına 2024 jyly Astanadaǵy U22 Azııa chempıonatynda kúmis júldeger atanǵan edi.
Ekinshi altyndy Vıktorııa Baıdýkova jeńip aldy. 57 kelide Vıktorııa Baıdýkova sheshýshi synda úndi qyzy Nansı Nansıge esh múmkindik bermeı, 3 márte nokdaýnǵa jiberdi. Nátıjesinde tóreshi jekpe-jekti 2-raýndta toqtatty.
Úshinshi altyndy Anar Tursynbek alyp, U22 Azııa chempıony atandy. 60 kelide Anar Tursynbek aqtyq synda Tájikstan ókili Hangoma Isoevamen aıqasty.
Otandasymyz shabýyl men qorǵanysta da óte sátti qımyldaı bildi. 3-raýndta Anar qarsylasyn nokdaýnǵa jibergen soń, dárigerlerdiń sheshimimen jekpe-jek toqtatyldy. Eskere ketetin jaıt, Anar Tursynbek 2024 jyly Astanadaǵy U22 Azııa chempıonatynda kúmis júldeni enshilegen bolatyn.
Sonymen qatar Tomırıs Myrzaqul, Gúlnar Turapbaı, Aqbota Bolat kúmis júldeger atandy.
Aıta keteıik, Astanada ótetin álem kýbogyna qatysatyn qazaqstandyq boksshylardyń aldyn ala tizimi anyqtaldy.