Bokstan Tokıo Olımpıadasyna irikteý aınalymynyń fınaldyq kezeńi ótkizilmeıdi
Halyqaralyq Olımpıada komıteti mundaı sheshimdi qabyldaýyna sportshylardyń densaýlyǵy men qaýipsizdigin saqtaý máselesi sebep bolǵan. HOK koronavırýsty ınfektsııaǵa qatysty álemdegi ahýaldy eskere otyryp, aımaqtyq irikteý týrnırlerinen bólek joldamany reıtıng arqyly úlestirýdi jón sanady.
«Biz barshańyzdyń bokstan Tokıo-2020 Olımpıadasyna irikteý týrnırlerin ótkizýge qosqan úlesińizdi joǵary baǵalaımyz. Bul jolda bizdiń basty basymdyǵymyz sportshylar bolǵany anyq. Osy oraıda, HOK halyqaralyq jol qatynastary men álem elderindegi shekteýlerdi tolyǵymen zerttedi. Sońǵy on kún ishinde biz Ulttyq Olımpıadalyq komıtettermen jáne federatsııalarmen, tehnıkalyq, medıtsınalyq mamandarmen, sondaı-aq, boksshylarmen aqyldasa kele, bokstan Olımpıadaǵa irikteý týrnıriniń josparyna ózgeris engizdik. Ózgeris engizý barysynda biz irikteý týrnırleriniń arasyndaǵy demalys ýaqytynyń kem degende 30 kúnge jetýin, boksshylardyń irikteý dodasyna, sondaı-aq, Olımpıada oıyndaryna tıisti deńgeıde daıyndalýyn basty mindetter qataryna qoıdyq. Sonymen qatar, memleketter arasyndaǵy jol saparlaryna shekteýdiń enýi men karantın talaptarynyń ózgerýi sportshylardyń tıisti deńgeıde daıyndalýyna kedergi keltiretini anyq boldy», - delingen habarlamada.
Osylaısha, 2021 jyldyń maýsymyna josparlanǵan Parıjdegi álemdik irikteý týrnıri ótkizilmeıdi. Fınaldyq irikteý synynda erler 32, áıelder 21 joldamany sarapqa salýy tıis bolatyn. Endi atalǵan joldamalar olımpıadalyq salmaqtar boıynsha tórt qurlyqqa (Azııa/Okeanııa, Afrıka, Eýropa, Amerıka) teń bólinedi.
Bokstan Qazaqstan áıelder komandasynyń enshisinde 75 kelige deıingi salmaqta Nadejda Rıabets enshilegen jalǵyz joldama bar. Qazirgi sátte bokstan qyzdar komandasynyń ózge múshelerinde Olımpıadaǵa baratyn múmkindik az. Óıtkeni, álemdik reıtıngide olardyń shekti mejeden ótý múmkindigi tómen kórsetilgen. Naqty sheshim aımaqtyq irikteý týrnırleri túgel aıaqtalǵan soń anyqtalmaq.
Búginge deıin Azııa/Okeanııa aımaǵy men Afrıkadaǵy irikteý dodasy aıaqtaldy. Al qurlyqtyq básekeler Amerıkada 10-16 mamyr aralyǵynda, al Eýropada maýsym aıynda ótedi dep boljanǵan.
Eske sala keteıik, Qazaqstan erler komandasy Iordanııanyń Amman qalasynda ótken aımaqtyq irikteý týrnırinde barlyq lıtsenzııaǵa qol jetkizdi. Tokıo tórinde Sáken Bıbosynov (52 keli), Serik Temirjanov (57 keli), Zákir Safıýllın (63 keli), Abylaıhan Júsipov (69 keli), Ábilhan Amanqul (75 keli), Bekzad Nurdáýletov (81 keli), Vasılıı Levıt (91 keli), Qamshybek Qońqabaev (+91 keli) synǵa túsedi.
