Bokstan stýdentter arasyndaǵy IV álem chempıonatynda Qazaqstan sportshylary 1 altyn, 4 kúmis, 4 qola enshiledi
ASTANA. Qazannyń 11-i. QazAqparat - Ulan-Batyrda ótken bokstan stýdentter arasyndaǵy IV álem chempıonatynda Qazaqstan sportshylary 1 altyn, 4 kúmis, 4 qola enshiledi. Bul aqparatty elimizdiń Boks federatsııasy taratyp otyr.
Keshe Mońǵolııa astanasy Ulan-Batyrda bokstan stýdentter arasyndaǵy IV álem chempıonaty óz máresine jetti. Baıraqty báseke barysynda jaman óner kórsetpegen qazaq boksshylarynyń 5-eýi aqtyq jekpe-jekterge shyqqan bolatyn. Alaıda 91 keli salmaqta óner kórsetken Danııar Ústembaev qana reseılik Aleksandr Karakazıandy 5:2 esebimen utyp, chempıon atandy. Al 49 keli salmaqta sharshy alańǵa shyqqan Mardan Berikbaev mońǵol boksshysy Pýrevdorj Serdambadan 1:2, 52 kelide óner kórsetken Ysmaıyl Ahýnov-Habı taǵy bir sharshy alań ıesi Naambaııar Týgtsogttan 2:13 esebimen utyldy. 60 keli sanatynda Ǵanı Jaılaýov ýkraındyq Denıs Berınchıkten, 69 kelide Rústem Svaev túrik Onder Sıpaldan utyldy. Sondaı-aq Qazaqstan qorjynyn Aıdar Sháribaev, Ádilet Nııazymbetov, Arbek Abdýlǵanıev, Rústem Іrgebaevtar qola medalmen tolyqtyrdy.
Komandalyq esepte 3 altyn, 3 kúmis jáne 2 qola medal ıelengen sharshy alań ıeleri kósh bastady. Al ekinshi, úshinshi oryndardy Reseı men Túrkııa quramasy bólisti.
