Bokstan «Strandja» týrnıri: Qamshybek Qońqabaev qarsylasyn nokaýtqa jiberdi

ASTANA. QazAqparat - Qazaqstandyq Qamshybek Qońqabaev Bolgarııa astanasy Sofııa qalasynda ótip jatqan bokstan halyqaralyq «Strandja-2023» týrnırindegi alǵashqy jekpe-jeginde qarsylasyn nokaýtpen jeńdi, dep habarlaıdy QazAqparat tilshisi.

Ol 92 keliden joǵary salmaqta 1/8 fınalda nıderlandııalyq Sten Bertenspen qolǵap túıistirdi. Nátıjesinde ekinshi raýndta qarsylasyn nokaýtqa jiberdi.

Osylaısha Qamshybek Qońqabaev 1/4 fınalǵa joldama aldy.

Qazaqstandyq sportshy buǵan deıin 2020 jylǵy jazǵy Olımpıadada qola júlde alsa, eki márte álem chempıonatynda kúmis medal ıegeri atanǵan. Al Azııa chempıonatynda tórt márte ekinshi oryn alǵan bolatyn.

Aıta ketsek, búgin kúndizgi sessııada el quramasynan Ertýǵan Zeınýllınov (63,5 keli) ózbekstandyq Mýjıbıllo Týrsýnovqa ese jiberdi.

Búgin Erasyl Tańqaı (60 keli) fılıppındik Pol Djýlaıfer Baskon, Nurqanat Raıys (75 keli) avstralııalyq Domınık Molınaromen sharshy alańǵa shyǵady.

Foto: instagram.com/kamshybek_team