Bokstan Shoqyr Bóltekuly atyndaǵy halyqaralyq týrnır ótip jatyr - Aqtaý
ASTANA. 30 qyrkúıek. QazAqparat - Osy kúnderi Aqtaý qalasyndaǵy «Kaspıı» sport kesheninde qazaq boksynyń negizin qalaýshy, bokstan elimizdiń tuńǵysh SSSR sport sheberi, eńbek sińirgen jattyqtyrýshy Shoqyr Bóltekulyn eske alýǵa arnalǵan eresekter arasyndaǵy VII halyqaralyq týrnır ótip jatyr.
Bul jaıynda «Alaman» sport agenttigi habarlaıdy.
Jarystyń ashylý saltanatyna London Olımpıadasynyń chempıony, Vel Barker Kýboginiń ıegeri Serik Sápıev pen jeke bapkeri Aleksandr Strelnıkov, Olımpıadanyń kúmis júldegeri Ádilbek Nııazymbetov pen quramanyń bas bapkeri Myrzaǵalı Aıtjanovtar qatysty. Jarysty ashpastan buryn Mańǵystaý oblysy ákiminiń orynbasary Qýanysh Muqanov oblystyq ákimshilik atynan S.Sápıev pen bapkeri A.Strelnıkovke 1 000 000 teńgeniń chegin tabys etti. Al Myrzaǵalı Aıtjanov Qazaqstan Respýblıkasy Іshki Іster mınıstri atynan Qazaqstanǵa eńbegi sińgen bapker, Á.Nııazymbetovtiń jeke bapkeri Marat Jakıevke «Qazaqstan polıtsııasyna 20 jyl» medalin tabystady. Bulardan basqa ákimshiliktiń arnaıy syılyqtarymen London Olımpıadasynyń tóreshisi, 2010 jylǵy álemniń úzdik tóreshisi Raqymjan Rysbaev, quramanyń bas bapkeri Myrzaǵalı Aıtjanov jáne boks ardageri, tuńǵysh Olımpıada Oıyndarynda tóreshilik etken qazaq Serik Ábdenalıevter de marapattaldy.
Bul joly atalmysh jarysqa Qytaı, Mońǵolııa, Reseı, Ýkraına, Ázirbaıjan, Ózbekstan, Qyrǵyzstan elderinen jáne Qazaqstannyń barlyq aımaqtarynan 150-den astam bylǵary qolǵap sheberleri jınaldy. Qatysýshylar sapynda esimderi álemge tanymal birneshe boksshylar bar. Aıta keter bolsaq, Qazaqstan ulttyq quramasyna úmitker boksshylar Vasılıı Levıt, Rýstam Svaev, Almat Serımov, Alekseı Sevostıanov, Qamshybek Qońqabaev, Baqytjan Qojabekov, Mereı Aqshalov, Dáýren Eleýsinov, Aıdar Sháribaev, Nurǵazy Júsipov, Temirtas Júsipov, Nursultan Kósheǵulov, Muhıt Amantaev, Sýleıman Berdýkaev, Berik Ábdrahmanov, t.b. Bulardan basqa Olımpıada jáne Álem chempıonattaryna qatysýshylar - qytaılyqtar Chong Maımaıtýrsýn men Maola Tohtychong, ázirbaıjandyqtar Gaıbatýlla Gadjıalıev pen Rahım Nadjafov, qyrǵyz elinen Azat Ýsenalıev, Ermek Sákenov pen Syımyq Abdyldabekýýlý, ózbek Alısher Mahmýdovtar da bar. Jalpy alǵanda jarysqa 8 halyqaralyq dárejedegi sport sheberleri qatysýda (V.Levıt, M.Aqshalov, B.Qojabekov, R.Svaev, B.Abdrahmanov, K.Ahmedov, I.Madrımov). 64, 69, 81 jáne 91 keliden joǵary salmaq dárejelerinde óte myqty boksshylar jınalǵan eken, bul salmaqtardaǵy jekpe-jekter óte tartysty ótedi dep kútilýde.
Qyrkúıektiń 26 jáne 27 kúnderi aldyn-ala kezdesýler boldy. Al keshe shırek fınaldyq kezdesýler ótti, óte tartysty ótken birneshe jekpe-jekterge arnaıy toqtala ketsek te bolady. Mysaly mańǵystaýlyq Muhıt Amantaev pen ÁCh-ǵa qatysýshy ázirbaıjandyq Rahım Nadjafov jáne almatylyqtar Shyńǵys Berdibekov pen Abylaıhan Muratovtardyń kezdesýleri jankúıerler kóńilinen shyqty deýge bolady.
