Bokstan ózge eldiń namysyn qorǵap júrgen qandasymyz elge oraldy
ASTANA. KAZINFORM – Bokstan ózge eldiń namysyn qorǵap júrgen qazaq boksshysy Aman Qonysbekov Ózbekstannan ata-jurtyna oraldy. Endi ol álemdik dodalarda Qazaqstan atynan, el aralyq syndarda Túrkistan oblysynyń atynan synǵa túspek.
Bul týraly KAZINFORM tilshisine Bokstan Ulttyq quramanyń bas bapkeri Myrzaǵalı Aıtjanov aıtyp berdi.
«Aman baýyrymyz jeltoqsan aıynda Astanada turatyn týysqan aǵasymen birge kelip tanysyp, elge birjola kóship kelgenin, endi aldaǵy ýaqytta qazaq sportshylarymen birge jattyǵyp, solarmen birge elimizdiń namysyn qorǵaǵysy keletininderin aıtty. Árıne, kelem degen balanyń keýdesinen ıterý tabıǵatymyzda joq. Elge el qosylsa qut emes pe... Men kelisim beretinimdi aıttym. Alaıda, kelmes buryn Ózbekstanǵa baryp, burynǵy bapkerińnen zańdy turde ruqsatyńdy alyp kel dep jiberdim. Ol meniń tapsyrmamdy oıdaǵydaı oryndap keldi. Qazir bizdiń boksshylarmen birge Almatydaǵy oqý-jattyǵý jıyndarynda júr. Bolashaqta Túrkistan oblysynyń atynan synǵa túsetin bolady», - dedi bas bapker.
Aıta keteıik, Aman Qonysbekov bokstan 2023 jylǵy Ózbekstan Respýblıkasynyń chempıonatynda qola júlde enshilegen. 71 kelige deıingi salmaqta óner kórsetedi.
