Bokstan Olımpıadanyń eki dúrkin júldegeri Bolat Jumadilovke páteri qaıtaryldy
Spıkerdiń aıtýynsha, birneshe aı buryn oǵan bank ókilderi habarlasyp, sportshyny izdep taba almaı jatqanyn habarlaǵan.
«Bokstan qazaqtyń jaryq juldyzy Bolat Jumadilov – bizdiń qoǵamnyń qurmetti múshesi. Sondyqtan bankten mán-jaıdy suraǵanda, ol banktegi qaryzyn qaıtara almaı júrgeni belgili boldy. Onyń ústine, sol kezde sot sheshimi shyǵyp, sot oryndaýshylary men baǵalaýshylar kelip, páterin alyp qoımaqshy bolǵan. Osy syn saǵatta bizdiń Sportshylar odaǵy, sportshylar men Olımpıada chempıondary Bolatqa kómek kórsetýge bel sheshtik. Biz «ForteBank» pen Ulttyq bank basshylyǵyna hat jazyp, atalǵan máseleni sheshýge kómek kórsetýdi suradyq. Sondaı-aq olarmen kezdestik. Osydan soń komıssııa qurylyp, qaıta qarjylandyrý, aresti alyp tastaý, basqa da sheshimder shyqty. Allaǵa shúkir, máselemiz sheshildi. Osy oraıda Bolattaı qazaq boksynyń jaryq juldyzyn eskerip, máselesin túsinip, kómek kórsetkeni úshin bankterdiń basshylyǵyna alǵys aıtamyz. Qazir Bolat otbasymen Astanada, óziniń eki bólmeli páterinde turyp jatyr», - dedi Azamat Qarlyǵashev.
Ol sondaı-aq Sportshylar odaǵy tarapynan sportshylardyń basqa da máseleleri boıynsha kómek kórsetilip jatqanyn atap ótti.
«Shyny kerek, biz basqa da sportshylarǵa kómektesip júrmiz. Mysaly, aýyr atletıkadan Azııa chempıony Aıdar Qazovtyń joǵaryda atalǵan máselege uqsas problemasyn sheshýge qol ushyn berdik. Al qazir aýyr atlet, Olımpıada oıyndarynyń qola júldegeri Zúlfııa Chınshanloǵa kómektesip jatyrmyz. Jalpy, sportshylarymyz osyndaı máselelerge tap bolǵan kezde jáne olardyń zań aıasyndaǵy jumystardy jaqsy bile bermeýi sebebinen olarǵa árqashan kómekke kelýge daıynbyz», - dedi spıker.
