Bokstan Olımpıadaǵa irikteý týrnıri: Zákir Safıýllın alǵashqy aıqasynda jeńiske jetti
SULTAN. QazAqparat – Búgin Iordanııanyń Amman qalasynda ótip jatqan bokstan Olımpıadaǵa irikteý týrnırinde erler arasynda 63 keli salmaqta Zákir Safıýllın sharshy alańǵa shyǵyp, alǵashqy jekpe-jegin jeńispen bastady, dep habarlaıdy QazAqparat tilshisi.
Ol alǵashqy kezdesýdi Qytaı boksshysy Jang Shanmen ótkizip, qarsylasyn jarys jolynan taıdyrdy.
Osylaısha, Ǵalymbek Kenjebaev baptaıtyn boksshylar alǵashqy jekpe-jekterin jeńispen bastady.
Endi sanaýly mınýttardan keıin 81 keli salmaqta synǵa túsetin Bekzat Nurdáýletov sharshy alańǵa shyǵady. Ol Jańa Zelandııa ókili Jerom Pompellonege qarsy shyǵady. Sondaı-aq, keshki sessııada taǵy bir boksshymyz 75 keli salmaqta Ábilhan Amanqul Olımpıada joldamasyna talasty bastaıdy.
Esterińizge sala keteıik, keshe áıelder boksynan sharshy alańǵa shyqqan qazaqstandyq eki sportshy qarsylastaryna jol berip, joldamadan tys qaldy. Týrnırde Olımpıada oıyndaryna barlyǵy 63 lıtsenzııa úlestiriledi.
