Bokstan Mańǵystaý men Aqmola oblysynyń quramalary Qazaqstan boks federatsııasynyń kýbogy úshin jarysynyń jartylaı fınalyna ótti
ASTANA. 22 qazan. QazAqparat - 20 qazan kúni «Qazaqstan boks federatsııasynyń kýbogy» respýblıkalyq jarysynyń shırek fınaldyq eki matchy ótti.
«Batys» dıvızıony aıasynda Jańaózen qalasynda ótken jarysta Mańǵystaý oblysynyń komandasy 9:1 esebimen qonaqtardy - Atyraý oblysynyń quramasyn jeńdi.
Al «Soltústik» dıvızıony aıasynda Aqmola oblysynyń Jaqsy kentinde ótken kezdesýde alań ıeleri 6:4 esebimen Qaraǵandy oblysynyń komandasynan basym tústi.
Jartylaı fınaldyń ekinshi juby 27 qazan kúni anyqtalatyn bolady. Endi «Ońtústik» dıvızıony aıasynda jartylaı fınalǵa shyǵý múmkindigi úshin Shymkent qalasynda ótetin jarystarda Ońtústik Qazaqstan men Almaty qalasynyń komandalary baq talastyratyn bolady. Al «Shyǵys» dıvızıonyndaǵy jarystar Óskemen qalasynda ótedi. Onda Shyǵys Qazaqstan men Almaty oblysynyń komandalary judyryqtasady.
Qazaqstan boks federatsııasy kýbogynyń jartylaı fınaldyq kezdesýleri 7 jeltoqsan kúni, al aqtyq match 15 jeltoqsanda Astana qalasynda ótedi.
