Bokstan Londonda ótetin eýropalyq irikteý týrnıri toqtatyldy

NUR-SULTAN. QazAqparat – Álemdegi koronavırýs qaýpine baılanysty Halyqaralyq Olımpıada komıteti bokstan Londonda ótetin eýropalyq irikteý týrnırin ýaqytsha toqtatty, dep habarlaıdy QazAqparat tilshisi.

QR Ulttyq olımpıadalyq komıteti habarlaǵandaı, Londonda ótetin eýropalyq irikteý týrnırinnen bólek, Amerıkadaǵy irikteý básekesi men mamyr aıynda ótýi tıis álemdik kezeń de keıinge shegerilgen.

14 naýryz kúni bastaý alǵan Eýropa aımaqtyq irikteý týrnıri búgin keshki sessııa kezdesýinen soń toqtatylady. Týrnır 24 naýryzda aıaqtalýy tıis edi. Uıym mundaı qadamǵa sportshylar men resmı tulǵalardyń jáne týrnırdi uıymdastyrýǵa jaýapty barlyq qatysýshylardyń densaýlyǵyn qorǵaý maqsatynda barǵan.

Dese de, Halyqaralyq Olımpıada komıteti Tokıodaǵy Olımpıada oıyndarynyń dál ýaqytynda bastalatynyna senimdi.