Bokstan lıtsenzııalyq týrnır: Qazaqstandyq boksshy qyz ekinshi jeńisine qol jetkizdi

ASTANA. KAZINFORM - Bokstan Italııanyń Býsto-Arsıtsıo qalasynda ótip jatqan halyqaralyq lıtsenzııalyq týrnırde qazaqstandyq boksshy Rımma Volosenko Italııadaǵy ekinshi aıqasyn ótkizip, taǵy da jeńiske jetti.

Otandasymyz osylaısha irikteý týrnıriniń 1/8 fınalyna shyqty. 

60 kelide el namysyn qorǵap júrgen Volosenko ekinshi jekpe-jeginde vengrııalyq Petra Sabomen kezdesken edi. Bul synda qazaqstandyq boksshy qarsylasyn esh qyıyndyqsyz utty. Tipti, úshinshi raýndta qarsylasyn nokdaýnǵa jiberip úlgerdi.

Esterińizge sala keteıik, atalǵan týrnırdiń alǵashqy aıqasynda otandasymyz Trınıdad Tobago eliniń ókili Tıanna Gýımen kezdesip, tóreshiler sheshimimen basym túsken bolatyn.

Búgin sondaı-aq, 71 keli salmaqta Aslanbek shymbergenov pen 63,5 kelide Mýhammedsabyr Bazarbaıuly sharshy alańǵa shyǵady.

Esterińizge sala keteıik, atalǵan týrnırde Parıj Olımpıadasynyń joldamasyna erlerden alty, áıelderden bes boksshy qatysyp jatyr.

Lıtsenzııalyq týrnırde erler arasynda 28, áıelder arasynda 21 joldama sarapqa salynýda.

Týrnır 3-12 naýryz aralyǵynda ótedi.