Bokstan lıtsenzııalyq týrnır: Aıbek Oralbaı ekinshi jeńisine qol jetkizdi
ASTANA. KAZINFORM – Italııanyń Býsto-Arsıtsıo qalasynda ótip jatqan lıtsenzııalyq týrnırde qazaqstandyq boksshy Aıbek Oralbaı ekinshi jeńisine qol jetkizdi.
Naqtyraq aıtsaq, otandasymyz Olımpıadaǵa irikteý týrnıriniń 1/16 fınalynda (92 kg) Ońtústik Koreıa boksshysy ıÝng Ha Neýldi jeńdi.
Ol úshinshi raýndta qarsylasyn nokdaýnǵa túsirdi. Nátıjesinde Aıbek Oralbaı Italııadaǵy dodanyń 1/8 fınalyna shyqty.
Esterińizge sala keteıik, osyǵan deıin Qazaqstan quramasynyń kapıtany Aslanbek Shymbergenov ekinshi ret jeńiske jetkenin jazǵan bolatynbyz. Boksshy atalǵan álemdik týrnırdiń 1/16 fınalynda (71 kg) polshalyq Damıan Dýrkachti jeńdi.
Sondaı-aq erler arasynda 63,5 kelidegi el namysyn qorǵap jatqan Muhammedsabyr Bazarbaıuly 1/16 fınalda Eýropa chempıony Radoslav Rosenovtan jeńilip qaldy.
Sonymen qatar búgin 54 keli salmaqta Jaına Shekerbekova irikteý kezeńiniń alǵashqy aıqasynda 1/16 fınalda Nıgerııa ókili Shýkýra Karımge ese jiberip, jarysty aıaqtasa, taǵy bir burymdy boksshymyz 60 kelide judyryqtasqan boksshymyz Rımma Volosenko tórtinshi jekpe-jeginde, ıaǵnı, shırek fınalda Slovakııa sportshysy Mıroslava Jedınakovaǵa tóreshiler sheshimimen ese jiberip, lıtsenzııadan qur qaldy.
Aıta keteıik, Parıj Olımpıadasynyń joldamasy sarapqa salynyp jatqan týrnır 3 naýryzda bastalǵan bolatyn. Jarys 12 naýryz kúni máresine jetedi. Atalǵan týrnırde erler arasynda 28, áıelder arasynda 21 joldama sarapqa salynýda. Qazaqstan quramasynan erlerden 6, áıelderden 5 boksshy joldamaǵa talasyp jatyr.
