Bokstan qyzdar arasyndaǵy álem chempıonaty qashan jáne qaıda ótedi
QR Boks federatsııasy baspasóz qyzmetiniń habarlaýynsha, álem chempıonaty Úndistannyń Nıý-Delı qalasynda ótedi. Atalǵan álem birinshiligi 13-25 qarasha aralyǵyna josparlanǵan.
Bokstan qyzdar arasyndaǵy eń alǵashqy Álem birinshiligi 2001 jyly AQSh memleketiniń Pensılvanııa shtatynda ornalasqan Skrenton qalasynda ótken bolatyn. Al bıyl baıraqty báseke onynshy márte jalaýyn kóteredi.
Osyǵan deıin názik jandar arasyndaǵy dúnıejúzilik jarystardyń kóbi Ońtústik-shyǵys Azııa memleketterinde ótti. Atap aıtsaq, Tsınhýandao (Qytaı), Chedjý (Ońtústik Koreıa), sonymen qatar, 2016 jyly elordamyz Astana qalasynda da uıymdastyryldy. Úndi eli bolsa bul saıysty osymen ekinshi ret qabyldap otyr (birinshi ret 2006 jyly dál osy Nıý-Delıde bolǵan).
Al sońǵy ret 2016 jyly bizdiń elde bolǵan álem chempıonatynda Qazaqstan quramasy jasyndaı jarqyldap, arýlarymyz naǵyz erlik kórsetken edi. Atap aıtsaq, Nazym Qyzaıbaı (48 keli), Dına Jolaman (54 keli), Valentına Halzova (69 keli) men Lázzat Kúngeıbaeva (81+ keli) altynnan alqa taǵynyp, Jaına Shekerbekova (51 keli) men Aıjan Hodjabekova (57 keli) qola medalǵa qol jetkizgen edi. Sondaı-aq, Qytaı, AQSh, Frantsııa men Ulybrıtanııa eliniń sańlaqtary da joǵary nátıje kórsetken.
Foto: geometria.tv