Qazaqstan quramasyn 1,5 jyl jattyqtyrǵan bapker boksshylardyń jetistikterine toqtaldy

ASTANA. KAZINFORM – Bokstan Qazaqstan ulttyq quramasy bas bapkeri qyzmetinen ketken Qaırat Sátjanov atqarǵan jumystary jóninde pikirin bildirdi.

Tájirıbeli maman bul qyzmetti 2024 jyldyń tamyz aıynda qolǵa alǵan edi.

– Federatsııa tarapynan ulttyq qurama tizginin ustaý jóninde usynys tústi. Sodan beri bir jarym jylǵa jýyq eńbek ettim. Bul ýaqyt ishinde birlesken túrde aýqymdy jumystar atqaryldy. Kóp jylǵy tájirıbe jáne biliktiligimizdi paıdalana bildik. Kórsetkish kóńil qýantty. Byltyr Ispanııada ótken jarysta kósh basynda boldyq. Bolgarııadaǵy Strandja týrnırinde komandalyq esepte birinshi oryn enshimizge buıyrdy. Sondaı-aq Serbııa, Nıderlandta ótken týrnırlerde, elordada bolǵan álem kýbogy kezeńinde birinshi oryn enshimizge buıyrdy. Qýanarlyǵy, World Boxing jáne IBA aıasynda ótken álem chempıonattarynda shákirtterim shıraq qımylymen kózge tústi, - dedi Qaırat Sátjanov.

Onyń aıtýynsha, bıyl da jaýapty jarystar ótedi. Onda da elimizdiń bylǵary qolǵap sheberleri jankúıerlerdi joǵary kórsetkishimen qýantady degen senim mol.

– Bıyl naýryz aıynda Azııa chempıonaty ótse, odan keıin álem kýbogynyń birneshe kezeńi kútip tur. Qyrkúıek aıynda Azııa oıyndary jalaýyn kóteredi. Bul saıystarda qazaqstandyq boksshylar jeńis tuǵyryna kóteriledi dep senemin, - dedi ol.

Elimizdiń erler quramasy Qaırat Sátjanovtyń jetekshiligimen ótken jylǵy qyrkúıek aıynda World Boxing aıasyndaǵy álem chempıonatynda 5 altyn aldy. Olardyń qatarynda Mahmud Sabyrhan (55 keli), Sanjar Tashkenbaı (50 keli), Tórehan Sabyrhan (70 keli), Aıbek Oralbaı (90 keli) bar. 

Al jeltoqsan aıynda IBA aıasynda bolǵan álem chempıonatynda Sáken Bıbosynov (54 keli), Orazbek Asylqulov (57 keli), Abylaıhan Júsipov (71 keli) altyn, Sabyrjan Aqqalyqov (75 keli) kúmis, Temirtas Júsipov (48 keli), Ertýǵan Zeınýllınov (63,5 keli) qola júldeger atandy. 

Aıta ketsek, endi elimizdiń bokstan erler quramasy tizginin Nurjan Nasanov ustady.