Bokstan QR Prezıdentiniń kýbogy halyqaralyq týrnırine 11 eldiń ulttyq quramasy qatysýda - Bas bapker Myrzaǵalı Aıtjanov
ALMATY. 1 mamyr. QazAqparat - Bokstan eresekter arasyndaǵy QR Prezıdenti kýbogy ІІІ halyqaralyq týrnıri ulttyq quramalar úshin Londondaǵy HHH Jazǵy olımpıada oıyndaryna daıyndyqtyń basy bolǵaly otyr.
Qazaqstan ulttyq quramasynyń bas bapkeri Myrzaǵalı Aıtjanov búgin Almatyda ótken baspasóz máslıhatynda osylaı aıtty.
«Bul týrnırde birinshi oryn alý basty maqsat bolyp otyrǵan joq. Bizge eń mańyzdysy - tájirıbe. Oǵan Úndistan, Kýba, Sırııa elderi 1-qurammen, al Reseı men Ýkraına 2-qurammen qatysýda. Al el namysyn 17 sportshy qorǵaǵaly otyr. Ulttyq quramanyń úzdikteri túgeldeı enip otyr», - dedi M.Aıtjanov. Myrzaǵalı Qulanulynyń aıtýynsha, jarys qarsańynda Qazaqstan men Úndistan quramalary Almatyda birlesken oqý-jattyǵý jıynyn ótkizdi. Oǵan Úndistannyń Olımpıada oıyndaryna joldama alǵan 7 boksshysynyń altaýy qatysty. Endi qazaqstandyqtar QR Prezıdenti kýbogy týrnırinen keıin Dondon dodasyna naqty daıyndyqty bastaıdy. Onda bylǵary qolǵap sheberleri aldymen 10 kún teńiz jaǵasynda tynyǵyp, qandaı da bir jaraqattary bolsa emdeıdi. Al 9-30 maýsym kúnderi jalpy dene daıyndyǵyn jasap, aqyrǵy oqý-jattyǵý jıynyn Astanada ótkizip, 22 shildede Londonǵa jol tartady dep josparlanýda.
