Bokstan QR áıelder quramasyna jańa bas bapker taǵaıyndaldy
QR Boks federatsııasynan málim etkendeı, Qazaqstan boks federatsııasy bapkerler keńesiniń usynymen jáne Qazaqstan Ulttyq olımpıadalyq komıteti, QR Mádenıet jáne sport mınıstrligi Dene shynyqtyrý jáne sport komıtetiniń maquldaýymen Erik Alǵabek áıelder boksynan Qazaqstan komandasynyń bas bapkeri bolyp taǵaıyndaldy.
Aıta keteıik, 2005 jyldan bastap burymdy arýlarymyzdy Vadım Prısıajnıýk baptap keldi. Onyń jetekshiligimen Ulttyq qurama qurlyqtaǵy úzdikter qatarynan kórinip keledi. Osy ýaqytqa deıin boksshy qyzdar álem chempıonattarynan 5 altyn, 4 kúmis jáne 7 qola medal ıelense, Olımpıada oıyndarynda eki qola medal (2012 jylǵy Olımpıada oıyndarynda Marına Volnova, 2016 jylǵy Olımpıadada Darıǵa Shákimova) jeńip aldy.
Bas bapker myqty quram jasaqtap, sportshylarymyz halyqaralyq týrnırlerde úzdikter qatarynan kórindi. Qazaqstan boks federatsııasy uzaq jylǵy jemisti eńbegi men elimizdegi boksshylardy daıyndaýǵa qosqan úlesi úshin Vadım Prısıajnıýkke alǵys bildirdi.
Aıta keteıik, sońǵy Azııa chempıonatynda qazaqstandyq qyzdar «altyn» men «kúmiske» jete almady. Osydan soń, bapkerler keńesi komandany daıyndaý úshin jańa kúsh, jańa baǵyt kerektigin sheshken.
Áıelder komandasynyń basshylyǵyna kelgen Erik Alǵabektiń eńbek ótili - 15 jyl. 2011-2016 jyldar aralyǵynda jasóspirim qyzdar men jastar komandasynyń bas bapkeri qyzmetin atqaryp, álem chempıonattarynan 4 altyn jáne 23 qola medal jeńip alýlaryna septigin tıgizgen. 2011 jyldan beri Alǵabek olımpıadalyq daıarlaý ortalyǵynda aǵa bapker qyzmetin atqardy.