Bokstan konfederatsııa kýbogy: Túrkistan oblysy fınalǵa shyqty
Búgin jartylaı fınalda Túrkistan jáne Qaraǵandy oblystary ózara kúsh synasty. Boksshylar segiz salmaqta ózara sheberlik baıqasty. Alǵashqy jekpe-jekte 52 kelide Túrkistan oblysynan Sáken Bıbosynov qaraǵandylyq Talǵat Syrymbetovti aıqyn basymdyqpen jeńip ketti. Kelesi 57 keli salmaqta qaraǵandylyq Rústem Shaýmenov túrkistandyq Qaırat Erálıevti, 63 kelide qaraǵandylyq Vasılıı Samchýk tóreshilerdiń biraýyzdan qabyldaǵan sheshimimen túrkistandyq Shynybek Nazarbekovti tize búktirdi.
Al 69 kelide túrkistandyq Bekdáýlet Ibragımov qaraǵandylyq Baýyrjan Asylbekovti jeńse, 75 kelide tóreshiler qaraǵandylyq Ersultan Sovetov túrkistandyq Beken Pernehandy jeńgenin málim etti. Túrkistandyq Bek Nurmaǵambet 81 kelide qaraǵandylyq Erdos Nurqalyny aıqyn basymdyqpen utsa, 91 kelide túrkistandyq Abzal Quttybekov qaraǵandylyq qarsylasy Azamat Jumabekovten aılasyn asyrdy. Al 91 keliden joǵary salmaqta túrkistandyq Nurlan Saparbaı qaraǵandylyq Dmıtrıı Zıskony jeńip ketti. Osylaısha Túrkistan oblysynyń quramasy qarsylasynan 5:3 esebimen basym túsip, jartylaı fınalǵa joldama aldy.
Al jartylaı fınalda taǵy bir jupty Nur-Sultan qalasy men Mańǵystaý oblysynyń komandalary qurady. Qazir eki komanda boksshylary arasyndaǵy alǵashqy jekpe-jek aıaqtaldy. Nur-Sultan qalasynyń boksshysy Azat Mahmetov mańǵystaýlyq Qýanysh Dúısenbaıdan basym tústi.
Fınalǵa joldama alǵan eki komanda erteń, 8 jeltoqsanda ózara sheberlik baıqasady.
Bokstan Konfederatsııa kýbogy 2010 jyldan beri turaqty túrde ótkizilip keledi. Budan buryn Mańǵystaý oblysy úsh márte jeńimpaz (2012, 2016, 2018) atansa, Nur-Sultan qalasy eki (2010, 2013), Túrkistan oblysy eki (2015, 2017), Qaraǵandy oblysy bir (2011) márte bıik tuǵyrdan kórindi.
Bokstan Konfederatsııa kýbogynyń toptyq kezeńiniń jerebesi bıylǵy jyldyń qyrkúıek aıynda tartylǵan bolatyn.
Foto: www.kfb.kz