Bokstan Qazaqstannyń jastar quramasy Álem birinshiliginde laıyqty óner kórsetedi dep sanaımyn - Memlekettik jattyqtyrýshy B. Ábdirahmanov
ASTANA. Sáýirdiń 14-i. QazAqparat /Jasulan Amanbaıuly/ - Qazaqstan quramasy bokstan Álem birinshiliginde laıyqty óner kórsetedi dep sanaımyn.
Búgin Astanada Qazaqstannyń Boks federatsııasynyń jyl ishindegi jumystaryn qorytyndylaýǵa arnalǵan baspasóz máslıhaty barysynda QR memlekettik jattyqtyrýshysy Bolat Ábdirahmanov osylaı atap kórsetti, dep habarlaıdy QazAqparat.
«Sońǵy ret jastarymyz Álem birinshiliginen 7 jyl buryn altyn medalmen oralǵan. Ol Kýbada ótken chempıonatta Іlııastyń medali edi. Sodan beri Qazaqstan komandasy qanjyǵasyna altyn baılamaǵan eken. Osyǵan oraı, jattyqtyrýshylar shtabymen birlesip, jastar boksyn damytýdyń jańa josparyn jasaqtadyq», deıdi Qazaqstannyń memlekettik jattyqtyrýshysy Bolat Ábdirahmanov.
Irannyń Tegeran qalasynda ótken Azııa chempıonatynda Qazaqstan quramasy jalpy esepte 1-shi oryndy ıelenýi Qazaqstannyń Boks federatsııasynyń júıeli jumysynyń jemisi dep aıtyp otyr. Onyń aıtýynsha, durys tańdalǵan jumys baǵyty, jattyqtyrýlardyń jańa ádisteri óziniń jemisterin berýde.
Qazaq boksshylarynyń sheberligin arttyrý maqsatynda halyqaralyq joldastyq-matchtyq kezdesýler ótkizý úrdiske aınalyp barady. Qazaqstan jastar quramasy Ázirbaıjan, Reseı, Qyrǵyzstan, Ózbekstan quramalarymen Aqtóbede qolǵap túıistirdi. Sodan keıin Taldyqorǵanda Kýba, Ázirbaıjan jáne Almaty oblysynyń jas boksshylarymen birlesken jattyǵýlar jıynyn ótkizgennen keıin, komandalyq esepte bir-birlerimen synǵa tústi. Nazar Іlııasov jattyqtyratyn Qazaqstan jastar quramasy osy eki eldiń jáne Almaty oblysynyń jastar arasyndaǵy quramalarymen álem chempıonaty aldyndaǵy daıyndyqtaryn pysyqtady. Barlyq kezdesýlerde de Qazaqstannyń jastar quramasy jeńiske jetken bolatyn.
«Keıingi jyldary jastar boksyn damytýǵa baǵyttalǵan ıgi qadamdar, Qazaqstan quramasynyń Álem birinshiliginde laıyqty óner kórsetýine yqpal jasaıdy dep sanaımyn», dep atap kórsetti Memlekettik bapker B. Ábdirahmanov.
Sáýirdiń 20-sy men mamyrdyń 2-si aralyǵynda Ázirbaıjanda bokstan jastar arasyndaǵy Álem chempıonaty ótedi. Nazar Іlııasov jattyqtyratyn ulttyq quramaǵa 21 bylǵary qolǵap sheberi enip otyr.
Olardyń ishinde bıyl naýryz aıynda Irannyń Tegeran qalasynda ótken Azııa chempıonatynda komanda qorjynyna altyn medal salǵan N. Qaljanov, E. Dúsenbaev, M. Nursultanov pen A. Kópensheev syndy jas boksshylarǵa senim artylǵan.
