Bokstan Qazaqstannyń jasóspirimder quramasy Álem chempıonatyna qatysady
ASTANA. QazAqparat - Bokstan Qazaqstannyń jasóspirimder qurama komandasy 2015 jylǵy Álem chempıonatyn qatyspaq. Dúbirli doda 4-12 qyrkúıekte Sankt-Peterbor qalasynda ótedi, dep habarlanǵan QR boks federatsııasynyń saıtynda.
Halyqaralyq boks qaýymdastyǵynyń resmı saıty: " Bul jarys bylǵary qolǵap jas sheberleri úshin aldaǵy sporttyq ómirdegi alǵashqy qadamdardyń biri bolmaq, sondyqtan qatysýshylardan joǵary sapaly boksty kútemin", - dep AIBA prezıdenti doktor Chıng-Kýo Výdiń sózin keltirgen.
Jasóspirimder quramasynyń aǵa bapkeri Qaırat Saıjanovtyń aıtýynsha, jattyqtyrýshylarda tolyq quramyn bekitý úshin bir aıdaı ýaqyt bar. Sportshylar shildeniń 10-26 aralyǵynda Ystyqkólde oqý-jattyǵý jıynyn ótkizip, tamyzdyń basynda Qostanaıdaǵy A.Mıroshnıchenko atyndaǵy jarysqa qatysady. Tek osydan keıin ǵana álem chempıonatyna attanatyn boksshylardyń esimderi belgili bolady. "Álem chempıonatynyń aldynda 20 tamyz ben 2 qyrkúıek aralyǵynda Almatyda sońǵy jıynyn ótkizip, Sankt-Peterbor qalasyna jolǵa shyǵamyz, - deıdi Qaırat Tursynhanuly. - Shilde-tamyz aılarynan keıin keıbir salmaq dárejeleri boıynsha sheshim qabyldaımyz, árıne, kórsetkishterimizdi jaqsartýǵa tyrysamyz". Jarysqa 13 salmaq dárejeleri boıynsha 15-16 jasar boksshylar qatysa alady. Sankt-Petebor qalasyna 80 eldiń ókilderi keledi dep kútilýde.
