Bokstan Qazaqstannyń ulttyq qurama komandasy Búkilálemdik boks akademııasynda oqý-jattyǵý jıynyn ótkizedi
ALMATY. QazAqparat- Bokstan Qazaqstannyń Ulttyq qurama komandasy aldaǵy 6-27 tamyz aralyǵynda Almaty oblysynyń Talǵar aýdanynda ornalasqan Búkilálemdik boks akademııasynda jalpy dene daıarlyǵy boıynsha oqý-jattyǵý jıynyn ótkizedi. Bul týraly búgin Qazaqstan boks federatsııasynyń baspasóz qyzmetinen habarlady.
Bul jıynǵa ulttyq qurama komandanyń barlyq úsh quramy men respýblıka óńirlerinen bolashaǵynan úmit kúttiretin taǵy jıyrmaǵa jýyq jas boksshylar qatysady.
Myrzaǵalı Aıtjanovtyń shákirtteri jalpy dene daıarlyǵy boıynsha oqý-jattyǵý jıynyn jaqsy kóńil-kúıde bastamaq. Ótken shilde aıynda Ulttyq qurama komanda Túrkııada saýyqtyrý jıynyn ótkizgen bolatyn.
«Bul saýyqtyrý jıyny óte jaqsy ótti. Ózderińiz bilesizder, boksshylarymyz bıylǵy jyldyń alǵashqy jartysynda kóptegen mańyzdy týrnırlerge qatysty. Sondyqtan komandaǵa demalys kerek boldy. Biraq árıne jigitter Túrkııaǵa jáı týrıst retinde barǵan joq. Munda olar trenajerlik zalda kún saıyn ár túrli jattyǵýlar jasady. Sporttyq oıyndarǵa qatysty. Teńizde shomyldy. Bir sózben aıtqanda jigitter jaqsy demalyp qaıtty. Endi aldaǵy bolatyn daıyndyq jumystaryna jańa kúsh-qýatpen qulshyna kirisetin bolady» - dedi óz sózinde bokstan Qazaqstan Ulttyq qurama komandasynyń bas bapkeri Myrzaǵalı Aıtjanov.
Esterińizge sala keteıik, ústimizdegi jyldyń 19 qyrkúıegi men 4 qazany aralyǵynda Ońtústik Koreıanyń Inchhon qalasynda XVII Azııa oıyndary bolady. Oǵan 45 elden 12 myńnan astam adam qatysady dep kútilýde. Munda sportshylar sporttyń 36 túrinen júldeli oryndardy sarapqa salady.
