Bokstan Qazaqstan spartakıadasy: Jastar arasynda talanttylar az emes
Jartylaı fınalda 52 kelide túrkistandyq Sáken Bıbosynov pen Aqtóbe oblysynyń ókili Abaı Qýandyqov alǵashqy jubynda qolǵap túıistiredi. Ekinshi jupta Soltústik Qazaqstan oblysynan kelgen Evgenıı Pavlov pen kóptegen halyqaralyq týrnırlerde júldegerler qatarynan kórinip júrgen astanalyq Azat Mahmetov sheberlik baıqasady.
Elimizdegi tájirıbeli bylǵary qolǵap sheberleriniń biri Samatálı Tóltaev 60 kelide aqmolalyq Ersultan Bolatpen fınalǵa beriletin joldamany sarapqa salady. Atalmysh salmaqtaǵy taǵy bir jupta 2016 jylǵy Qazaqstan chempıony Ádilet Qurmetov pen pavlodarlyq Serik Temirjanov synǵa túsedi.
Aqmola oblysynan kelgen Talǵat Sháıken 69 kelide mamandar men jankúıerler kózine tústi. Bıyl 19 jasqa endi kelgen ol spartakıada barysynda qarsylasynyń birin nokaýtpen jeńdi. Mamandar onyń sheberlik deńgeıin joǵary baǵalap otyr. Bul salmaqtaǵy qalǵan boksshylardyń barlyǵy - tájirıbeli sportshylar. Olardyń qatarynda jambyldyq Stanıslav Tsoı, pavlodarlyq Aıatýlla Tákejanov pen Nur-Sultannan Qanaǵat Maralov bar.
Al 81 kelide Azııa chempıonatynyń kúmis júldegeri Erik Áljanov pen qyzylordalyq Qýandyq Júsip sharshy alańǵa shyǵady. Túrkistandyq tájiıbeli boksshy Dinıslam Ábdeshov jartylaı fınalda jastar arasyndaǵy álem chempıony Nurbek Oralbaımen sheberlik baıqasady.
Aýyr salmaq sanalatyn 91 kelide 6 mamyrda Qostanaı oblysynan kelgen Danıl Semenov pen aqtóbelik Erjan Seıtimbetov kezdesedi. Al taǵy bir jupta Nur-Sultan qalasynan kelgen Nurbolat Sermahanov pen jambyldyq Nursultan Amanjolov tartysqa túsedi.
Spartakıada barysynda jarysty tamashalaýshylar qatarynda álem chempıony jáne eki márte Azııa oıyndarynyń kúmis júldegeri Birjan Jaqypov ta boldy. Ol búginde ortalyq áskerı sport klýby quramasynda aǵa bapker qyzmetin atqarady.
«Bizdiń klýb quramynan ár oblys komandasy sapynda synǵa túsip jatqan boksshylar bar. Atap aıtsaq, Sáken Bıbosynov, Erjan Jomart syndy jigitter bizdiń mamandar tálimin alyp keledi. Bıyl Qytaıda áskerı oıyndar saıysy ótkiziledi. Ony Olımpıada oıyndary qatarynda sanaýǵa bolady. Degenmen oǵan tek áskerıler qatysa alady. Oǵan bizdiń klýb quramasy sapyndaǵy jastar barady. Biz spartakıada barysynda sol jarysqa úmitkerlerdi irikteýge nazar aýdaryp otyrmyz. Sondaı-aq, alda ótken Prezıdent kýbogynda da daıyndyǵy joǵary boksshylardy irikteıtin bolamyz. Jas talanttardy da kózden tasa etpeımiz. Spartakıada barysynda jastar quramasy sapyndaǵy boksshylardyń tájirıbesi tolysyp kele jatqanyn ańǵardyq. Degenmen bul eresekter arasyndaǵy báseke ekenin eske shyǵarmaýymyz tıis. Árıne, olar áli de tehnıkasyn jetildire túskeni artyqtyq etpeıdi. Dese de olardyń áleýetin joǵary baǵalaýǵa ábden bolady», - dedi Birjan Jaqypov.
Esterińizge sala ketelik, 6 mamyrda jartylaı fınal oıyndary Nur-Sultan ýaqytymen 16.00-de Qyzylorda qalasyndaǵy «Muz saraıy» arenasynda bastalady. Al 7 mamyrda 13.00-de fınalǵa shyqqan boksshylar básekege túsedi.
Biz budan buryn 49, 56, 64, 75 jáne 91 keli salmaqtaǵy bylǵary qolǵap sheberleri sheberlik baıqasqanyn habarlaǵan edik