Bokstan Qazaqstan spartakıadasy: Bapkerler jastarǵa zor úmit artyp otyr
Іrikteý kezeńindegi jekpe-jekterde boksshylar bir-birimen óte saq oınady. Eshqandaı nokdaýn bolǵan joq. Sondaı-aq, jaraqat alǵandar da az kezdesti.
Jarys barysynda tájirıbeli boksshynyń biri - túrkistandyq Jomart Erjan 49 keli salmaqta óziniń daıyndyǵy joǵary ekenin ańǵartty. Jomart Mańǵystaý oblysynan kelgen Dinmuhamed Ibragımovtyń osal tusyn taba bildi. Ol endi jartylaı fınalda Almaty oblysynyń boksshysy Jandosa Nesipjanmen sharshy alańǵa shyǵady.
Spartakıada barysynda elimizdiń ulttyq qurama bapkerleriniń kózine ilikken Aqmola oblysynan kelgen 21 jastaǵy Orazbek Asylqulov 56 keli salmaqta bas júldeden basty úmitkerler qatarynda sanalady. Jas boksshy spartakıada baǵdarlamasyna sáıkes 6 mamyrda Іlııas Súleımenovpen jekpe-jekke shyǵady.
Al jastar arasyndaǵy álem chempıonatynyń kúmis júldegeri Ermahan Jakpekov altynnan úmitker qataryndaǵy qaraǵandylyq Ersultan Sovetovpen kimniń myqty ekenin anyqtaıdy. Jasóspirimder arasyndaǵy Olımpıada chempıony, Nur-Sultan qalasynan kelgen Aıbek Oralbaı da ázirge bapkerler úmitin aqtap otyr.
Bokstan elimizdiń ulttyq quramasynyń bapkeri Myrzaǵalı Aıtjanovtyń aıtýynsha, spartakıada barysynda Nur-Sultan qalasy, Túrkistan jáne Mańǵystaý oblystarynyń boksshylary jaqsy deńgeıde oıyn kórsetip otyr. Atalmysh jarysqa elimizdegi boks sportynyń úzdikteri qatyspaǵanyna qaramastan, árbir jekpe-jek jankúıer kóńilinen tolyq shyǵyp keledi.
«Boks saıystary joǵary deńgeıde ótkizilýde. Básekelestik óte kúshti. Jarysta negizinen 1999, 2000 jylǵy boksshylar sany basym. Men 2000 jyly dúnıege kelgen boksshylar arasynda bolashaǵynan úmit kúttiretin jastardyń kóp ekenin ańǵardym. Olardyń qatarynda Talǵat Sháken, Ermahan Jakpekov jáne ózge de sportshylar bar. Jartylaı fınal jáne fınalda budan da óte tartysty jekpe-jekter kóremiz degen oıdamyz», - dedi Myrzaǵalı Aıtjanov.
Mamandardyń aıtýynsha, spartakıada - komandalyq oıyn. Onda barlyq aımaqtardyń jumys deńgeıi saralanady.
5 mamyrda 52, 60, 69, 81 jáne 91 keli salmaqtaǵy boksshylar shırek fınal oıyndaryn ótkizedi. Jarys Nur-Sultan ýaqytymen 16.00-de bastalady. Fınal 7 mamyrda 12.00-de ótedi.
Boksshylar arasyndaǵy spartakıada Qazsport telearnasynan kórsetiledi. Jekpe-jekterdi onlaın rejimde Qazaqstan boks federatsııasy saıtynan qadaǵalaýǵa bolady.
Buǵan deıin Qyzylordada bokstan eresekter arasynda jazǵy spartakıada bastalǵany habarlanǵan bolatyn.
