Bokstan Qazaqstan quramasynyń jańa kapıtany anyqtaldy
ASTANA. QazAqparat - Bokstan Qazaqstan quramasynyń jańa kapıtany anyqtaldy, dep habarlaıdy QazAqparat QR boks federatsııasynyń baspasóz qyzmetine silteme jasap.
Endi bul mindetti Ádilbek Nııazymbetov atqarady. Buǵan deıin quramanyń kapıtany Danııar Eleýsinov boldy. Jaqynda ol mansabyn kásipqoı boksta jalǵastyratynyn málim etti.
"Myrzaǵalı Aıtjanovtyń basqarýyndaǵy Qazaqstan quramasynyń bapkerlik quramy ózara aqyldasa kele kapıtandyq mindetti Ádilbek Nııazymbetovke berýdi jón kórdi", - delingen habarlamada.
Aıta keteıik, Ádilbek Nııazymbetov - Olımpıada oıyndarynyń eki dúrkin kúmis júldegeri sonymen qatar, onyń enshisinde álem chempıonatynyń eki kúmis júldesi jáne Azııa oıyndary men Azııa birinshiliginiń altyn júldeleri bar. 
