Bokstan Qazaqstan quramasy Sofııa qalasynda ótetin iri jarysqa qatysady
Qazaqstan Ulttyq olımpıada komıteti habarlaǵanyndaı, Bolgarııa astanasynda 14 aqpan kúni bastalatyn týrnırde elimizden on boksshy rıngke shyǵady.
Olardyń arasynda 2016 jylǵy Rıo olımpıadasynyń kúmis júldegeri Vasılıı Levıt (91 kg), álem chempıony Qaırat Eralıev (56 kg), Qazaqstan quramasynyń kapıtany Qamshybek Qońqabaev (+91 kg) bar.
Sonymen qatar Temirtas Júsipov (49 kg), Ánýar Muzapparov (52 kg), Zákir Safıýllın (60 kg), Sanatáli Tóltaev (64 kg), Abylaıhan Júsipov (69 kg), Erik Áljanov (75 kg) jáne Bek Nurmaǵanbet (81 kg) synǵa túsedi.
Eske sala keteıik, budan buryn qazaqstandyq boksshylar Vengrııada ótken týrnırge qatysqan bolatyn.
Onda olar úsh altyn, bir-birden kúmis jáne qola medalǵa ıe boldy.
Atap aıtqanda, Sáken Bıbosynov (52 kg), Serik Temirjanov (60 kg), Tursynbaı Qulahmet (75 kg) chempıon atansa, Orazbek Asylqulov (56 kg) kúmis, Sabyrjan Baqbergenov (64 kg) qola júldemen oralǵan edi.