Bokstan Qazaqstan quramasy Álem chempıonatyna tolyq quramda qatysady
ASTANA. QazAqparat - Bokstan Qazaqstannyń ultyq quramasy Gambýrgte ótetin álem chempıonatyna tolyq quramda qatysady. Bul jaıynda Qazaqstan Boks federatsııasynyń baspasóz qyzmetinen málim etti, dep habarlaıdy QazAqparat.
Federatsııa aqparatyna sáıkes, aǵymdaǵy jyldyń 30 sáýiri men 7 mamyry aralyǵynda Tashkentte ótken Azııa chempıonatynyń qorytyndysynda Qazaqstan qurama komandasy 2017 jyly Gambýrgte ótetin álem chempıonatyna qatysý úshin 9 salmaq sanatynda lıtsenzııa jeńip alǵan.
Aıta keterligi, osy aıda Qazaqstan Boks federatsııasyna AIBA-dan 49 keli salmaq sanatynda álem chempıonatyna qatysý quqyǵyn jeńip alǵan ındonezııalyq boksshy Kvangý Langý lıtsenzııadan bas tartqandyǵy týraly habar jetken bolatyn. Kvangý Langý men qazaqstandyq Jomart Erjan Tashkentte Gambýrgke joldama úshin judyryqtasyp, ındonezııalyq jeńip ketken edi. Erejege sáıkes boksshy jarysqa qatysýdan bas tartsa, onda lıtsenzııa reıtıngte kelesi turǵan boksshyǵa beriledi. Qazaqstan Boks federatsııasy AIBA ótinishin qabyl alyp, ulttyq qurama komandamyzdyń múshesi Jomart Erjannyń 2017 jylǵy álem chempıonatyna qatysatyndyǵyn qýattady. Osylaısha, Qazaqstan komandasy aldaǵy álem chempıonatynda barlyq salmaq sanaty boıynsha jarys jolyna shyǵady.
Qazirgi ýaqytta Jomart kúsh jınaýda. Gambýrgke deıin elimizdiń qurama komandasy 2 jıyn ótkizedi. Onyń biri 12 shilde kúni Almaty oblysyndaǵy Búkilálemdik boks akademııasynda bastalyp ketti. Ekinshi oqý-jattyǵý jıyny 10 tamyz kúni Astanada bastalady.
Qazaqstan ulttyq quramasynyń bas bapkeri Myrzaǵalı Aıtjanov álem chempıonatyna deıin Jomart Erjannyń kúsh jınap, jarysqa 100 protsent daıyn bolaryna senimdi.
«Árıne, ol daıyndalyp úlgeredi. Ol jyl boıy barlyq oqý-jattyǵý jıyndaryna qatysty. Menińshe, bul oǵan berilip otyrǵan taǵy bir múmkindik. Árbir boksshy álem chempıonatyna qatysýdy armandaıdy. Endi ol osy múmkinshilikti paıdalanýy tıis», - dedi Myrzaǵalı Aıtjanov.
