Bokstan Qazaqstan quramasy Álem chempıonatyna daıyndyqty bastady
NUR-SULTAN. QazAqparat – Bokstan Qazaqstan Ulttyq quramasy Almatydaǵy Búkilálemdik AІVA boks akademııasynyń bazasynda álem birinshiligine daıyndalyp jatyr. Bul týraly QazAqparat tilshisine quramanyń bas bapkeri Ǵalymbek Kenjebaev málim etti.
«Qazirgi tańda ulttyq quramanyń barlyq múshelerimen Almatyda Búkilálemdik AІVA boks akademııasynyń bazasynda oqý-jattyǵý jıynyn ótkizip jatyrmyz. Bul - aldaǵy kele jatqan Álem chempıonatyna daıyndyq. Alataý bókterinde boksshylar taýǵa shyǵý, tas laqtyrý, júgirý sııaqty fızıkalyq daıyndyqtaryn jetildirýde. Endi sanaýly kúnderden keıin sońǵy daıyndyǵymyzdy elordada pysyqtap, ary qaraı Ekaterınbýrgte ótetin Álem chempıonatyna attanamyz», - dep atap ótti bas bapker.
Álem birinshiliginde el namysyn kimder qorǵaıtyny týraly saýalǵa Ǵ.Kenjebaev qysqa ǵana jaýap qaıyrdy.
«Álem birinshiliginde el namysyn kimderdiń qorǵaıtynyn osy Almatydaǵy oqý-jattyǵý jıyny aıaqtalǵannan keıin aıtamyz. Eń mańyzdysy, bıylǵy jyldyń basty dodasyna boksshylar tolyq quramda baryp baq synaıdy», - dedi Ǵalymbek Kenjebaev.
Aıta keteıik, bokstan erler arasyndaǵy Álem chempıonaty qyrkúıek aıynda Ekaterınbýrgte (Reseı) ótedi dep josparlanǵan.
