Bokstan Qazaqstan quramasy músheleriniń Azııa chempıonatyna daıyndyǵy qalaı
ASTANA. KAZINFORM - Bokstan Qazaqstan erler quramasynyń músheleri Mahmud Sabyrhan men Aıbek Oralbaı Mońǵolııanyń Ulanbatyr qalasynda ótip jatqan 2026 jylǵy Azııa chempıonatyna daıyndyq barysy jóninde áńgimelep berdi.
Bul jóninde olar Qazaqstan boks federatsııasy baspasóz qyzmetine bergen suhbatynda aıtty.
Mahmud Sabyrhan (55 keli) qurlyqtyq dodaǵa daıyndyq barysy joǵary deńgeıde ótkenin tilge tıek etti.
- Aldymen biz Túrkistan oblysynda birlesken oqý-jattyǵý jıynyn ótkizdik. Daıyndyq barysynda olar aldaǵy Azııa chempıonatyna daıyndyq júrgizedi. Halyqaralyq deńgeıdegi jattyǵý jıynyna Ózbekstan, Túrikmenstan, Germanııa, Túrkııa quramalary keldi. Daıyndyǵymyz óte keremet ótti. Jaqsy jekpe-jek ótkize aldyq. Endi aldaǵy kúnderde sol daıyndyq barysyn is júzinde dáleldeıtin bolamyz. Men buǵan deıin 2019 jyly Mońǵolııada jastar arasynda Azııa chempıonatynda baq synaǵan edim. Sol joly qurlyqtyq doda jeńimpazy atandym. Endigi maqsatym - sondaı bıikten taǵy bir márte kóriný. Qarsylastyń osaly joq. Olardyń arasynda Ózbekstan, Japonııa, Úndistan, Qytaı, Mońǵolııa boksshylary bar. Biz bul elge erte keldik. Bul eldiń ýaqyty men klımatyna beıimdele aldyq, - dedi Mahmud Sabyrhan.
Sondaı-aq ulttyq quramanyń taǵy bir múshesi Aıbek Oralbaı (90 keliden joǵary) qurlyqtyq dodaǵa daıyndyǵy jóninde áńgimelep berdi.
- Mońǵolııaǵa kelgenimizge úsh-tórt kún ýaqyt boldy. Jerebe arqyly qarsylastarymyzdy anyqtadyq. Ulttyq qurama músheleri mundaı jarysqa alǵash ret qatysyp otyrǵan joq. Men mundaı básekege úshinshi márte qatysyp otyrmyn. Endigi kezekte barymyzdy salyp, komandalyq esepte kósh bastaýdy aldymyzǵa maqsat etip otyrmyz. Men qazirge deıin qarsylastarymnyń barlyǵymen jekpe-jekke shyǵyp úlgerdim. Azııa chempıonaty qyrkúıek aıynda ótetin Azııa oıyndaryna daıyndyq ispettes. Qurlyqtyq dodada jeńimpaz atansam elimizde Azııa chempıony ataǵyn jeńip alǵan úshinshi boksshy bolamyn. Al bas bapkerimiz Nurjan Nasanov - biz úshin burynnan tanys. Sondyqtan aldaǵy jarysta joǵary deńgeıde oıyn kórsete alamyz degen oıdamyn, - dedi Aıbek Oralbaı.
Aldaǵy Azııa chempıonatynda Mahmud Sabyrhan men Aıbek Oralbaıdan ózge el quramasynda Sanjar Táshkenbaı (50 keli), Mahmud Sabyrhan (55 keli), Orazbek Asylqulov (60 keli), Ertýǵan Zeınýlınov (65 keli), Tórehan Sabyrhan (70 keli), Sabyrjan Aqqalyqov (75 keli), Erasyl Jaqpekov (80 keli), Nurbek Oralbaı (85 keli), Saǵyndyq Toǵambaı (90 keli) synǵa túsedi.
Eske salsaq, budan buryn Nurjan Nysanov bokstan Qazaqstan erler quramasynyń Azııa chempıonatyna daıyndyǵyn aıtyp berdi.
